✽✽ “Gjeopolitiche”: un tiermin impuartant no dome tal vocabolari dai esperts di strategjie politiche militâr, ma ancje par ducj ducj chei che a crodin te autodeterminazion tant che prospetive pussibile di cambiament. In sintesi: cualsisedi progjet di autonomie dal Friûl, ma ancje di aplicazion concrete de specialitât regjonâl, al varès di fâ i conts cu la colocazion sul atlant di chest cjantonut dal mont.
✽✽ Cuant che o fevelìn di autonomie dal Friûl si riferìn ai diviers nivei là che e pues esplicitâsi la forme di autoguvier di un popul. Di chê – scjarse – che e je cumò intal ordenament istituzionâl talian, a chê plui radicâl che si prefigure tant che indipendence. Dutis chestis opzions, plui o mancul realistichis, a varan però di calcolâ la posizion nevralgjiche di chest teritori.
✽✽ Dal pont di viste storic lu savìn ben, ma al sarà ben ribatilu, par dimostrâ cemût che il Friûl nol sedi mai stât ai margjins des vicendis europeanis e ancje mondiâls.
✽✽ In chescj mês, chest gjornâl al à contât ben trop impuartant che al fos il rûl dal Patriarcjât di Aquilee, la Patrie dal Friûl, cuâl che al è stât l’acaniment di Vignesie, dal Papât, di Napoleon intal distruzint la potence, e di consecuence la imagjin. Une storie che nissun libri talian al conte, e une altre dimostrazion de rimozion sfuarçade imponude di ogni gnûf domini forest.
✽✽ Par no jessi acusâts ancjemò une volte, e in maniere stupide, di nostalgjiis arcaichis, al bastarès pensâ a cetant che chestis tieris, chescj confins a son stâts determinants intal cors dai doi conflits mondiâi dal secul passât o inte vuere frede di dopo, intal scuintri tra democraziis ocidentâls e comunisim, tra Stâts Unîts e Urss. A Gurize, come a Berlin, il confin al taiave la citât in doi.
✽✽ Dute cheste jentrade par ribati che il voli atent dal imperi american nol lassarà mai di poiâ la cjalade su ce che al sucêt di chestis bandis. Il riposizionament de fuarce aerie statunitense des basis in Gjermanie a chê di Davian, di dulà che, par altri, no si son mai motis lis testadis nucleârs, le dîs lungje su lis pocjis pussibilitâts de Cine di meti cualchi bandierute sul Alt Adriatic, midiant de vie de sede.
✽✽ Cun tancj salûts a chei che a àn pontadis dutis lis pussibilitâts di futûr regjonâl su cheste ipotesi. ❚
Dree Valcic