CE CHE O VIN PIERDÛT. Il dopli zûc dai Savorgnan, che a difindevin Udin e a judavin Vignesie

La famee di siôrs che e à pesât di plui
te colade dal Patriarcjât
Al jere di tant timp che la famee dai Savorgnans e veve prestade la sô fedeltât e ancje, in plui di cualchi ocasion, la sô spade a Vignesie, fasint cubie cun jê par che al colàs il Patriarcjât filoimperiâl. La sperance e jere chê di sostituî ae Patrie dal Friûl une Signorie personâl, sul model di tantis altris che a stevin vignint fûr ator pe Italie, tant che i Gonzaghe a Mantue, i de Medici a Florence, i Estens a Ferare o ancjemò i Visconts prime e po dopo i Sforza a Milan. Intal 1394, Tristan Savorgnan al veve massacrât a Udin il Patriarcje Zuan di Moravie, promovint une liste di presentâ al Pape di Rome di ducj i delits e des azions nefandis che il Patriarcje al varès cometût, e che e larès studiade cun grande atenzion tant che esempli di “distruzion de imagjin publiche”, creazion di un mostri che nol veve cuasi plui nuie di uman ma pluitost al incjarnave il diaul cun ducj i siei vizis e la sô tristerie. Cuintri dai Savorgnans si jere mobilitade chê nobiltât furlane fedêl ae Corone e che e veve cjatade in Cividât e inte famee Bojani une sô rapresentance emblematiche di contraponi a Udin e ai Savorgnans. Al è aromai clâr che dut ce che si môf in Friûl – ma chest, fintremai de ete protostoriche – al à simpri vût un respîr plui grant, rivant a cjapâ dentri une dimension europeane. La sucession complicade dal Patriarcje sassinât si inserìs cussì intune partide di scacs internazionâl, fate ancjemò plui grivie dai ultins agns dal Schisme di  Ocident (1377-1417), là che propit cul Concili di Cividât dal 1409 si cirarà, ma cence sucès, di cjatâ fûr une soluzion. Gregori XII, al secul Agnul Correr, disputantsi il titul di pape cun altris doi rivâi, si movarà politichementri fasint une sielte drastiche, stiçant lis boris di une situazion furlane bielzà precarie e pericolose. La mosse coragjose e fo chê di parâ fûr dal tron patriarcjâl Antoni Pancera (1408) promovint invezit la cariere fortunade dal so rivâl politic, Ludovì di Teck, che no dome al jere inschiriât de bande de corone imperiâl, ma che al jere fintremai parint dal cont Fidrì di Ortemburg, un feudatari potent dal Imperadôr che cul so esercit al difindeve dut l’arc alpin orientâl, poiantsi al jutori di Sigjismont re di Ongjarie e fradi piçul dal Imperadôr Venceslau, in odôr di  deventâ prin o dopo Imperadôr ancje lui. Duncje une situazion pardabon precarie e delicade. Vignesie e jere preocupade, e la sô strategjie politiche si indreçarà a meti lis mans su la Patrie dal Friûl propit cjapant vantaç di dute cheste confusion. Il 1419 al viôt cussì un Patriarcje todesc, Ludovì di Teck, che al comande un esercit metût insiemi pe plui part di oms armâts inviâts dai feudataris furlans fedêi al Patriarcjât, e dongje di lôr une sdrume potente di soldâts e di cavalîrs ongjarês. Cuintri di lôr, i Savorgnans cun dute la rêt dai lôr fedêi supuartâts di Vignesie. Ae situazion no i volarà masse par precipitâ. Il Teck al reste isolât, bandonât di tantis comunitâts e citâts furlanis impuartantis che a àn miôr domandâi a Vignesie cundizions di pâs a lôr vantaç pluitost che riscjâ un destin no dal dut sclarît, là che ducj chei che a fasin resistence al progjet dai Savorgnans a vadin incuintri ae crudeltât e ae tristerie dai agressôrs. Ai 9 di Jugn dal 1419, il cont di Prate, Nicolùs, al veve sconfit a Banie i Venezians, copant 200 soldâts e fasint presonîrs plui di 700 di lôr. San Denêl al veve mandât in jutori un piçul esercit sedi di cavalîrs che di fantarie. Ancje la fazion antisavorgnane di Udin e veve cjapât cuatri soldâts di Vignesie e – par svindicâsi di ce che par solit il Leon di Sant Marc al faseve inte campagne furlane – ju vevin copâts, scuartâts e a vevin impirâts i cuarps parsore des puartis de citât. La rispueste e fo tremende: trente furlans a forin decapitâts, e vincj feminis cjapadis tant che ostaçs a faserin la stesse fin. Nol baste. Ai 11 di Lui la comunitât di Cividât, simbul de fazion filoimperiâl e salacor la plui dongje dal Patriarcje, e fas savê che e je disponibile a tratâ la pâs cun Vignesie. Fuarte di chest tradiment, la citât lagunâr ai 14 di Avost e scjafoie la citât di Sacîl e cun cuatri bombardis che a sdrumin lis sôs muraiis le oblee ae rese. Di chel moment alì, dut al cor svelt: ai 21 di Avost, i Siôrs di Purcie si declarin disponibii a parlamentâ la difese dal cjistiel; Davian al ven concuistât e il so cjistiel brusât par che nol coventi come presidi ai soldâts ongjarês. Ai 23 di Avost, ancje Cjanive si rint ai Venezians. Comunitâts, citâts e cjistiei a alcin lis mans, fûr che la citât di Prate che e resist fin ae sô fin. Che e sarà epiche. ❚