AI 32 DI MAI. In Friûl ancje fâ ridi e je une robe serie

No us aio simpri fevelât dai furlans come di int seriose, che no à timp di pierdi in fufignis, int che a à simpri alc ce fâ e che, cuant che e à un pôc di timp libar, e sielç un passetimp nome se al samee a un lavôr? Ben, chê chi e je une regule che e vâl scuasit simpri, ma no propite al cent par cent. Vêso mai fat câs aes ativitâts des Pro Loco e dai grups di paîs? Al è simpri almancul un grup di teatri. Stramp, no? A pensâ a ce mût che a son fats i furlans, il teatri al samearès la robe plui lontane pussibil dal lôr cjâf e dal lôr mût di fâ e di pensâ. Figurìnsi: il teatri al vûl dî fâsi viodi, metisi in mostre, e soredut jessi cualchidun che no tu sês pardabon, fâ fente. Imbroiâ, in cualchi mût. E ancje se cui che ti sta a cjalâ lu sa che chel che al fevele no tu sês pardabon tu ma un personaç, par un furlan nol pâr bon distès. E pûr, dut ce che o ai a pene dite nol conte: il teatri ai furlans ur plâs, e no nome lâ a viodilu, ur plâs propite fâlu. Intindìnsi: al è clâr che il teatri furlan, chel di paîs, no je robe sofisticade. Une robe come il teatri dal assurt, par dî, par un furlan al è assurt nome lâ a viodile, figurìnsi fâle. E no stin a fevelâ di balets, ancje parcè che il furlan medi al è coordenât come une borsete rose parsore di une gjachete zale. E cumò i pensarês ducj di vê capît dut: al è clâr, no? Il furlan al pues nome fâ teatri impegnât, une robe seriose, che par cui che le cjale e deventi scuasit un lavôr impen che un divertiment? E invezit no, propite par nuie: cuant che si met a recitâ, il furlan al interprete scuasit simpri comediis. Po ben, al sarà un mût par sbrocâ fûr ducj i pinsîrs, par rilassâsi, par jessi, almancul une volte ogni tant, diferent di ce che tu sês ducj i dîs, no?? No, no crôt che al sedi cussì: al sarès masse facil (e dopo, provait a pensâ: un furlan che si rilasse…Impussibil!). A fuarce di cirî une spiegazion, o ai capît che puartâ in sene robis di ridi al è pal furlan come fâ sù une cjase: une dimostrazion di indipendence, di maturitât, la ribelion finâl che e sancìs definitivementri che cumò al pues sielzi di bessôl, cence stâ plui a scoltâ i conseis de mame. Soredut chê cridade che ducj i furlans si sintin a dî di cuant che a son nassûts: «Su po, ninin, no sta fâ comediis»…
BETE DI SPERE