Sfuei Mensîl Furlan Indipendent
Archivi de Patrie

I PROTAGONISCJ – Cul patriarcje Volchîr la Patrie e rive ae sô estension plui grande

Diego Navarria

Ai 23 di Zenâr dal 1218, une setemane dopo de visite di Tomasin di Cerclarie contade achì dongje, al murive Wolfger von Erla. Nassût tor dal 1140, al jere patriarcje di Aquilee dal 1204. Al jere rivât insom de sô vite spindude intal stes timp sedi pal imperadôr che pal pape. Lis sôs fadiis gloriosis a vevin puartât grant vantaç a ducj i doi ma ancjemò di plui ae Glesie di Aquilee.
◆ Grant om di dirit, judiç amirât, ambassadôr unic tal intiessi mediazions, leterât une vore studiât e protetôr di poetis, Volchîr al è il spieli che la culture, il dirit e la negoziazion a valin simpri di plui de vuere. Di fat, cence doprâ lis armis ma dome cu la capacitât dialetiche, cun lui la Patrie dal Friûl e rive ae sô espansion massime e ae considerazion plui alte. Cu la Patrie ben plantade al ven di rive jù il benstâ dai furlans. Di fat, il patriarcje al cjape a cûr cui che al à plui dibisugne: al fonde l’ospitâl di S. Nicolau di Rude, al comede lis stradis, al garantìs sigurece, fintremai al paie il riscat dai furlans presonîrs dai sarasins. Par chest, al da acet ai Francescans e al fonde i Cavalîrs Teutonics. Un segnâl de bondance e je ancje la gnove biele monede fate bati di Volchîr, cul so non di une bande e la acuile di chê altre.
◆ Un cantin un pôc platât di Volchîr e je la sô vene poetiche. Pe sô dignitât di vescul al scrîf e al firme lis sôs operis cul pseudonim di Fridanc. Al somee che plui di cualchidun dai innomenâts Carmina Burana a sedin vignûts fûr de sô plume.
◆ Culture e pâs a son i siei obietîfs e al spint la sô vite a lavoronâ salt e a strussiâ par chest. Il pape Inocenç III lu clame “Puartadôr di pâs e di concuardie”. Pe int al è un sant e al somee che ancje il Signôr al provi a judâ la sô santificazion. Di fat Volchîr, dopo il funerâl, al ven sepulît intune arcje di piere grande e penze te basiliche di Aquilee. La arcje pesantone, a pene che i poin parsore il tapon di piere, si alce e e reste a dilunc solevade une cuarte par aiar, devant di ducj. Ma il miracul nol baste par fâ sant il patriarcje. Rome, che e à fat sants cuasi ducj i siei papis, e je simpri stade striçade par canonizâ patriarcjis di Aquilee. Chei fats sants si contin tai dêts di une man. No par nuie ancje il puar patriarcje Beltram al è ancjemò dome beât. ❚

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +