Pre Checo, par nature sô e par caratar al sintive fuart il sens de autonomie e di indipendence tant personâl che di popul. Ancje pe glesie al veve une vision plui di stamp orientâl, a ûs patriarcjâts cu lis propriis diversitâts che no di stamp roman, di uniformitât. Visions che, in chest mont simpri plui omologât, globalizât, cence anime, a tornin buinis. No par jessi ‘sovraniscj’ come che si clamin cumò, ma par stâ a pâr su la stesse taule, in forme federâl.
Tai dîs passâts, a Triest, i presidents talian e sloven a àn firmât la restituzion ai slovens dal Narodni dom. Mattarella in chê ocasion al à fevelât di “dialic fra culturis che a rindin chestis areis di confin preziosis pe vite de Europe”. O crodìn che nol sedi dome il talian e il sloven a puartâ indenant chest dialic, ma dutis lis culturis e lis diviersitâts de Europe. Ancje il furlan al è part di chest dialic pe vite de Europe.
pre Roman Michelot
Ma sigurementri la fonde plui valide no jere chê etniche, che lui le doprave soredut par fâ colp sul auditori, ma chê culturâl e linguistiche. A diference dai pôcs e flaps federaliscj de seconde e ultime ore, che a fasin fente di batisi par un federalisim fiscâl cence nissune reson di esisti al di là di un taticisim suspiet, pre Checo al à batût su la uniche fonde corete, concrete, oneste, sigure, sacrisante di ogni autonomie: la diversitât e peculiaritât culturâl e linguistiche. O sin un popul e o vin dirit di jessi tratâts di popul. O sin un popul cjapât dentri politichementri intune struture statâl che no je la nestre e che no je simpri stade nestre, dal moment che o vin mantignude simpri la stesse identitât ma o vin cambiât paron. E je la cuistion tant clare de distinzion fra “stât” e “nazion” che dome un stupit o un prevignût o un nazionalist nol rive a capîle. Come che nô o rispietìn i nestris dovês tai confronts de struture politiche dominante e legjitime, cussì la struture e à di ricognossi e rispietâ i nestris dirits.
Impuartance primarole par pre Checo , e ancje cheste e je une novitât e une anomalie tal scjap pôc fis e pôc onorific dai inteletuâi – e à la lenghe, che lui le à amade, venerade, gjoldude, doprade di mestri, soredut inte sô ativitât preferide: lis predicjis, i comizis in place, lis grandis lezions e conferencis. Une lenghe di puars ma no puare, sostanziose e sute come la nestre storie, adate par dî lis robis di fonde, essenziâls, e no par babâ. Une lenghe che e fâs biele figure ancje denant di Diu, inte celebrazion dai siei misteris e inte leture dal Libri sant che lui al à ispirât. ❚
