L’osservatori astronomic pontât sul cîl di Zui

L’Osservatori astronomic di Zui si cjate te suaze de Polse di Cougnes: un progjet un grum ampli, volût e puartât indevant di pre Giordano Cracina. Un grum ampli parcè che dongje de Plêf di San Pieri a àn cjapât vite diviersis iniziativis interessantis: l’ort botanic, la scuele dai scampanotadôrs, la biblioteche dedicade a pre Elio Venier, e v.i. L’osservatori al è stât realizât cirche 20 agns indaûr, cun chê che al fos “un voli viert viers il cîl”, e culì si cjate un dai plui grancj telescopis a nivel amatoriâl presints in Italie e un dai plui grancj telescopis de regjon.
◆ Ivan e Andrea Cescato, Federico Zarini e Nadia Straulino a son i gnûfs volontaris che dal 2018 a àn cjapât in man la gjestion e, in sostituzion dal vecjo grup astronomic, si dan da fâ puartant indevant diviersis iniziativis – soredut di Istât – e tignint di cont dute la struture.
◆ “Il telescopi al è un di chei grancj – al conte Federico – e al è formât di trê tocs: un pe osservazion dal cîl profont e specific pai studis, un plui piçul pe osservazion e un a visualizazion direte, pensât par fâ viodi il cîl a la int cuant che e ven culì. A son ducj furnîts di montadure motorizade: o vin une sale operative che e comande dute cheste strumentazion e o podìn determinâ in cualsisei moment dulà pontâ il telescopi, decidi ce viodi e duncje fâ une serade o un studi. Ancje la viertidure de cupule – di cirche un metri e mieç – ator dal telescopi e je gjestide di un computer che, daûr di ce che o vin di viodi, si posizione su la part di cîl indulà che al è il cuarp celest di cjalâ.”
◆ “O vin doi telescopis – al conte Andrea – che si podin puartâ ator, di dimensions ridotis e che, cuant che o vin ospits, o sistemìn tal cjamp scout achì dongje e li o fasìn lis osservazions. Un al è motorizât, e un al è manuâl. Se o cjalìn un cuarp celest doprant chel manuâl, o vin di movilu tignint cont de rotazion de tiere; al è clâr che al tocje ancje savê benon dulà che a son i sogjets di osservâ. Il telescopi motorizât, invezit, une volte programât, al cîr di bessôl ce che o vin di cjalâ e al manten simpri in maniere automatiche il centri oculâr sul cuarp celest che nus interesse. Chest imprest al è adat pe fotografie planetarie, ancje par ogjets no masse distants.”
◆ Ancje sot dal cîl cjargnel al è ce viodi dut il timp dal an, baste dome che al sedi timp biel e che si puedi cjatâ un puest cence interferencis di lûs artificiâls. “O vin i cuarps stagjonâi – al conte Federico – i planets Saturni e Jupitar a son i plui visibii, a àn un percors che tal nestri emisferi Nord si viôt dome di Istât. Altris ogjets ju podìn viodi miôr di Invier o dome di Invier; par esempli, la costelazion di Orion e jes di dì in Istât e di gnot di Invier e duncje se o vin voie di osservâ une nebulose come cheste, o vin di spietâ la stagjon frede”.
◆ “In ogni câs – nus dîs Nadia – us consei, par svicinâsi a chest mont, di comprâ un astrolabi, che al coste pôc e al è facil di doprâ: al è formât di une part dulà che e je la mape stelâr e di une part dulà che a son i periodis dal an. Baste meti insiemi il mês e la ore, e si capìs cuale part di cîl che si sta cjalant. Di chi, si ponte l’astrolabi a nord e a planc a planc si tache a ricognossi lis primis costelazions, partint di chês plui semplicis.”
◆ “Nô – al siere Ivan – us spietin achì pes variis iniziativis che o metìn adun, soredut di Istât. Di solit, o fasin cuatri seradis a teme indulà che si puedin viodi in particolâr i planets Saturni, Jupitar e Mart ma ancje alc altri che si môf tal cîl, come la Lune. O podês stânus daûr su Instagram, su facebook e sul sît https://astropolse.business.site/?fbclid=IwAR0sqp7yuStvebOKVHoYrUPPVIlbggEZadWDkl3-7W5eVsaktIfudDzu3vY”. ❚