CE SUCEDEVIAL IN CHÊ VOLTE TAL MONT? L’Imperi dai Turcs al rive in Europe, messedant violence e maravee

Inte storiografie taliane, il profîl de civiltât turche al ven dispès ridusût a cualchi linie aprossimade e svelte. Gjeneralmentri a vegnin piturâts tant che barbars crudêi piâts de sêt pal sanc dai bogns e brâfs cristians, fanatics dal lôr diu, Allah, e miscliçâts intune meste là che lis informazions storichis si smamissin e al reste dome che il savôr lami di une sugjestion imprecise, plui ispirade de liende che no de veretât. O savìn che bielzà intal secul XIII, salacor sburtadis di altris popui o di une cundizion climatiche spaventose, tribûs di mongui che si cjatavin intal cûr de Asie si moverin bande soreli a mont, concuistant in pôc timp chê fasse di teritori che e divideve il ream dai Czar de Russie dal altiplan iranian. Il princip Osman, intal 1326, al rivà a concuistâ la citât di Bursa, centri di une grande rêt di marcjâts e di caravanis, che e deventarà la prime grande capitâl di chel ream che al passarà ae storie tant che Otoman. Il sultan Suleyman, inte seconde metât di chel stes secul, al rivà a inserîsi jenfri lis cuistions teritoriâls dal imperi bizantin, cjapant volte par volte un toc dal so teritori. Ma prime di concuistâlu, la strategjie turche e jere chê di scjafoiâlu ben planc intune smuarse di control teritoriâl, dal moment che la flote bizantine e continuave a jessi une des plui impuartantis di dut il Mediterani, e i turcs no podevin dal sigûr jessi competitîfs. Cussì, la  prime grande ponte di espansion e fo indreçade sui Balcans, a someti lis popolazions dai slâfs che a vivevin inte aree de Serbie (la bataie epocâl di Kosovo Polje dal 1389) e de Bulgarie (1393). Cheste grande espansion e fo blocade di un princip orientâl, Timur il grant (Tamerlan, inte tradizion ocidentâl), che al rivà a jessi antagonist dai turcs intal control dai trois carovanîrs bande soreli jevât. La potence di Timur e obleà i sultans a fermâ la lôr espansion fin almancul al 1444, cuant che Murad II, a Varna, al rivarà a distruzi une armade cristiane là che serps, polacs e ongjarês a saran decimâts de potence dai cavalîrs otomans, ecezionâi e bogns di scombati a cjaval e di doprâ l’arc intal stes timp, fasint stragje di nemîs. Garantide la predominance su la tiere, al sarà Mehmet II, intal 1453, a concuistâ in maniere definitive la citât di Costantinopoli, che di in chê volte e cambiarà il non in Istanbul. La fuarce di chest imperi e sarà tant grande che i turcs a rivaran, ae fin dal ‘600, fin aes puartis di Viene, cuant che al tacarà il lôr declin. Ma, daûr di cheste organizazion militâr perfete, e jere un cort imperiâl che e saveve ben promovi culture, art, filosofie e bielece, tignint insiemi une gjeografie che e leve dal Egjit ai confins cu la Mongolie. Inteletuâi cristians di lenghe greghe, slâfs, ebreus, sirians, armens a contribuivin ae costruzion di une coinè culturâl di profîl cetant alt, che e savarà dialogâ cul mont ocidentâl e no dome combatilu. Ancje in chest câs, une storie dute di scuvierzi, plene di stupôr e di maravee. ❚