“Tropis personis puedial sostignî il planet? Lis stimis plui altis a fevelin di sessante milions di individuis, lis plui bassis di doi milions. Cierts esperts si posizionin tal mieç: disevot milions.”
Lierre Keith, Il mît vegjetarian (The vegetarian myth), 2015.
Tropis personis puedial sostignî il planet? Cheste e je la cuistion. E, se o vês let cun atenzion chi parsore, une rispueste le vin.
Par vê risorsis par ducj, te stesse cuantitât (animâi e plantis insiemi), i numars a varessin di stâ tor di un tot di milions di individuis. Tal an 2019, la popolazion mondiâl e je rivade a 7.713.468.205 di personis. Par dîle cuntun eufemisim, o sin a pene parsore dai numars citâts in precedence…
No dome, la cressite de popolazion no da segnâl di volê fermâsi: daûr dai esperts, o sarìn cuasi dîs miliarts tal 2050 e plui di undis pe fin dal secul. E no, amîs nazionaliscj: la colpe no je, in maniere semplicistiche, dai paîs puars o in vie di disvilup, tant che Cine o Indie. In Indie, par esempli, il consum pro capite di energjie par an al è tor dai 0,6MWh cuant che, invezit, in Americhe la medie e je di 11,4MWh par persone. Cjapìn une misure plui dongje cjase, la Gjermanie: 6MWh.
Ce nus disino chescj dâts? Che une persone tai continents siôrs e consume plui di dîs voltis in confront di une persone intun paîs puar. E chest al vâl ancje pai gnûfs nassûts: fâ un fi intun paîs siôr, al coste di plui in tiermins di utilizazion di energjie.
Cheste cuistion, dal gno pont di viste avonde alarmante, mi puarte a domandâmi (e o soi sigure che tancj altris le pensin come me) cuâl dirit che o ai jo, come uman, di fâ chest al planet. Mi capite di domandâmi avonde dispès se no je ore, in efiets, che la mê gjenerazion e tachi a rifleti suntune soluzion “sostignibile” e “responsabile”, che lis gjenerazions che a son vignudis prime di nô no àn vût bisugne di pensâi.
La soluzion li che o soi rivade jo e je chê di sielzi di no fâ fîs.
Al è dal sigûr un argoment delicât, che ancjemò nol ven tocjât masse, nancje di chei che si considerin lotadôrs pal ambient, ma nol covente a nuie platâ il probleme o ve pôre di frontâlu.
No vê fîs, massime par chel che al tocje i paîs plui avanzâts, e je une sielte ecosostignibile e ecoresponsabile.
Clâr, cheste sielte e sarà cjapade di ognidun in maniere diferente: cui che al sielzarà di fâ un fi in ogni câs (ancje se nol varà la pussibilitât di un bon futûr), cui che un fi nol sint la bisugne di vêlu, cui che al varà miôr la adozion e cui che al decidarà di no vê fîs cun angosse e sens di sacrifici, parcè che si autoimponarà un dovê morâl cun chê di fâ la sô part pal planet. ❚
