La vuere dai dâts no sparagne nissun

Brittany Kaiser e cognòs intun ristorant di Londre, a Mayfair, un dandy iresistibil che al zuie di polo, al bêf champagne e al colezione oparis di art. Si clame Alexander Nix e al è l’aministradôr delegât di une gnove societât: Cambridge Analytica. Jê, dotorande di 28 agns, e je une ativiste democratiche pai dirits dal om; i siei gjenitôrs le ritegnin «une persone vuidade di principis morâi, che e sarès stade buine ancje di vivi intun piçul apartament par lavorâ intune organizazion no profit che i crodeve». Ma i coventin bêçs, cussì e cole sot dal incjant di chest om carismatic che al bat su lis sôs debilecis: vanitât e ambizion. Il diaul al dopre simpri i stes sistemis…
◆ Come il dotôr Faust che, stuf dai studis canonics, si jere dât ae necromanzie sburtât de gole di podê, cussì Alexander Nix nol à fat studis regolârs ma al è deventât un strion dai dâts: inte ete dal digjitâl, al spieghe, i dâts a son il «gnûf petroli» e la lôr racuelte une «corse ai armaments». E in cheste vuere, Cambridge Analytica e à tirât dongje un arsenâl di dâts sui citadins americans, classificant lis personis cuntun metodi sofisticât di psicologjie comportamentâl: la analisi psicografiche. A ogni personalitât si da un numar di ponts che i psicolics a doprin par sielzi lis lôr motivazions prevalentis. Une scuadre di creatîfs podopo e pronte messaçs adats a ognidune di chestis categoriis.
◆ In ûs za dai agns ’70, la analisi psicografiche si doprave pôc, pai coscj di acuisizion dai dâts, che prin de ere dai social si ju cjapave sù cun cuistionaris individuâi. Cemût aie fat duncje CA a cjapâ dongje ducj chescj dâts? E à profitât di un fal di Facebook: fintremai al 2014, se un al zuiave – par esempli – a Candy Crush e al dave il consens al servizi, al lassave i siei dâts e chei dai siei amîs a cui che al veve disvilupade la aplicazion.
◆ Cambiadis lis regulis, Facebook al domande a CA di scancelâ i dâts cussì otignûts. CA si vuarde ben dal fâlu e e dopre il so database par condizionâ il vôt in diviersis tornadis eletorâls. Di cheste infrazion al ven fûr un dai scandui plui pençs dai nestris timps: il Datagate. Brittany Kaiser e je deventade diretore Business di CA; e cussì e pues testemoneâ cemût che la societât e vedi doprâts i dâts par influençâ il vôt su la Brexit e lis elezions presidenziâls americanis.
Il fruiâsi dal rapuart cu la compagnie e i titui su lis primis pagjinis dai gjornâi a sburtin Brit a sbregâ il so pat cul diaul, e a fâsi vôs di sot vie e ativiste digjitâl: il so “La Ditature dai dâts” al è un libri che nol pues mancjâ te biblioteche di cui che si ocupe di informazion e di comunicazion. Par chei altris, al covente a sclarî i problemis che la tecnologjie nus met devant ogni dì. ❚