Varis autôrs, Glesie in Friûl, Udin, 2010

“Intune ete che, cun miopie singolâr, e crôt di patî dutis lis soferencis pussibilis, chescj segns lassâts inte storie in decenis di persecuzion autentiche, a ripetin cun frescjece e gjonde l’anunzi dal Ream, l’anunzi de fieste. Par cui che al vueli fâ storie, o ancje dome par chei che a vuelin imparâ de storie, la vôs di chescj documents straordenaris si sint ancjemò ferme e clare”.
◆ Cussì Gabriele Pellizzari al siere la relazion che al à tignude intal ambit dai incuintris di Glesie furlane a Vençon intal 2010: “Feminis, perseguitâts e biâts te plui antighe iconografie cristiane”. E al è l’ultin dai articui di chest libri di une setantine di pagjinis insioradis di fotografiis e dissens, burît fûr de Patrie dal Friûl pai 933 agns de Patrie. Al è dividût in trê parts. La prime e fevele de messe grande che si ten a Aquilee ogni an pe fieste dai sants Ermacore e Fortunât (cuntune riflession di Venusia Dominici), dal insegnament dal furlan intes scuelis (Zuan Pieri Biasatti, che, intal editoriâl, al propon une conference episcopâl aquilieiese), de basiliche di Concuardie, dal ricuart de figure di pre Pauli Varutti (Sûr Fides e Rizieri De Tina). La seconde e je dute dedicade a Antoni Beline: il ricuart di un confradi (Tonin Cjapelâr), lis riflessions di un predi cjargnel (Roman Michelot), il caratar di profete e di pionîr dal predi di Vençon (Silvana Schiavi Facchin), l’amôr di Patrie (Dree Venier) e Cirint lis olmis di Diu (Duili Corgnâl). Al è ancje un intervent di Beline stes, scrit intai prins agns Doi mil, in ocasion de cunvigne des glesiis di Friûl-VJ, Venit e Trentin-Sudtirôl, “Benedictus trivenit in nomine domini”. E za il titul al dîs trop in dentri che al larà a sgrifâ: “Co lu àn copât (il lûc sant di Aquilee) che no stedin po doprâ ancje i vues o lis relicuiis restadis par rivâ in puart cu lis lôr cumbinis”.
◆ La tierce part e je di studis e documents. Remo Cacitti al met in lûs la impuartance fondamentâl dal parametri di ricercje teologjic par capî dute la simbologjie dai mosaics di Aquilee. Emidio Papinutti al fevele dal processionâl di Cividât, codiçs antigons che a ripuartavin i cjants des processions. Par ultin, l’articul di Pelizzari che – cul jutori di 12 imagjins – al ilustre la complessitât di chestis testemoneancis che nus àn lassadis chescj documents de nestre storie lontane: altri che pinsîr univoc! ❚