Nol è mai tart: ducj cu la Universitât dal Friûl

Intun biel editoriâl su «Udine Economica», il sfuei de Cjamare di Cumierç de Provincie di Udin, il president Giovanni Da Pozzo al marche la sô braure di jessi furlan ancje par vie che o vin une universitât nestre inviade par domande dal popul. Par dî la veretât lui al met dentri tra i sostignidôrs ancje lis istituzions e lis categoriis economichis.
Po ben, in chest al è un piçul fal: chei che a jerin “su lis baricadis” in chei timps si impensin invezit che tancj di lôr des categoriis economichis e politichis nostranis a jerin cuintri. I contraris a dopravin scusis come chê di «evitâ doplons» o «al è miôr lâ a studiâ intes grandis universitâts e no meti in pîts une universitât di seconde categorie» come che – secont lôr – e varès vût di deventâ chê di Udin.
Magari cussì no, al fo compagn ancje pe specialitât de Regjon, come che al ricuarde di sbris Cisilino a pagj. 3 tal editoriâl.
Cumò a son altris bataiis che o sburtìn par prins tant che furlaniscj: la gnove emergjence de Universitât metude in dificoltât dai tais di bêçs, la unitât des Provinciis Furlanis par une progjetualitât e inovazion ad hoc pal nestri teritori, la tutele e promozion de lenghe furlane, fatôr di unitât, partignince, iniziative, come che al è stât in tancj altris paîs.
No volaressin che ca di 30 agns, la Cciaa e marcàs la impuartance di chei che si spere a deventin risultâts acuisîts sicu la Universitât… dopo che ju àn puartâts indevant altris! Chestis bataiis, cumò, a volaressin finalmentri fatis insiemit a une imprenditorie economiche plui convinte: un tic mancul provinciâl e un tic plui nazionâl. Furlane.
Dree Venier