CULTURE – Silvano Bertossi (par c. di) A tavola con… la Storia del territorio

Il Comun di Flumisel, parie cun chei di Vile e di Rude, al è dentri ancje intune altre iniziative di dut altri gjenar. Silvano Bertossi e i ristoradôrs dal locâl Il ragno d’oro a àn dade vite intai agns dal 2002 al 2006 a une schirie di incuintris gastronomics culturâi une vore origjinâi: seradis di culture cun esperts di storie dal teritori, completadis di un bon mangjâ, daûr des ecipis rafinadis de siore Aurelia. Il libri al cjape dentri lis relazions tignudis di bande dai vincj relatôrs, une schirie di fotografiis che a ilustrin i moments di intrateniment, recipis detaiadis, documents storics.
Ancje il mangjâ ben al fas part de storie e un pocje di buine cuince culturâl no i fas dal sigûr nissun mâl a di un bon plat, anzit! O, al contrari, un bon plat no i fâs nissun mâl ae culture, anzit!
Un biel viaç che al partìs de antighitât e al rive fin in dì di vuê, là che o cjatìn personaçs tant che Napoleon, Casanova, Pasteur, Chiozza, Richard the lion heart, Isi Benini, Radetzky, Chino Ermacora… Oltri che pierçui, rîs, vins, pes, persuts e v.i.
La lenghe furlane e je presint in dôs des relazions, chê di Enzo Driussi, La puisie che scjalde il cûr, e chê di Benvenuto Castellarin, Int di flum; cun di plui, si le cjate in dôs poesiis, une di Mirella Fogar e une di Renzo Cecotti.
Di no pierdi, la schede tecniche dal documentari «In chel dì da lis mês gnocis», che o cjatìn a p. 180: o fasarìn cognossince cul ‘territorio di Brasiliano’, nuie mancul!
Ma in sumis: un libri che al sta ben in cusine, ma ancje inte librarie.
Laurin Zuan Nardin