Lauree ad honorem

Pensant a la cunvigne dade dongje de Facoltât di Siencis de formazion de Universitât di Udin ai 22 di Mai di chest an par une “Memoreazion de vite e des oparis di pre Antoni” si pues cun dute scletece confermâ che e je stade biele, induvinade, partecipade e sintude. Jo, personalmentri, le ai vivude come un grant moment: mi someave che in chê dì pre Antoni cu la “cuistion furlane” al fos jentrât pe puarte grande in chê universitât che e varès di sedi la mestre des mestris, il pilastri de nestre culture, il pan cuotidian di un Friûl che al à di frontâ l’avignî.
E je stade une memorie par vie che la lauree ad honorem si le da ai vîfs e no ai muarts, ma o resti simpri dal parê che la lauree a pre Antoni le à za dade la int che e à cjatât in lui un mestri no di erudizion ma di vite.
Bisugne dâur at ai professôrs de Universitât che cul Retôr magnific dot. Furio Honsell tal Fevrâr dal 2007 a vevin proponude a la unanimitât la lauree e al tocje ringraziâ chei che, partît pre Antoni, in sô memorie a àn dade dongje cheste cunvigne: in mût speciâl il Preside de facoltât Franco Fabbro, i relatôrs Roberto Dapit, Remo Cacitti, Rinaldo Fabris, Federico Rossi, e altris che a àn contribuît a rindi uniche la zornade.
O pensi e o speri che lis relazions e sore dut la “laudatio” a vegnin publicadis in curt par sancirâsi su lis motivazions de lauree che pre Antoni al varès vût di ricevi.
Pensant a dut chest, bisugne zontâ che la Universitât no pues suâsale tai confronts di pre Antoni cuntune memorie. No si salvarès ni la muse ni la cussience. Chest al à di sedi dome l’inizi e un prin segnâl di gambiament par començâ a parâ jù il trement debit che la scuele taliane e à intai nestris confronts. Un inizi “par une scuele” al scrîf pre Antoni “che e sedi la grande strade de autocussience dai furlans e dal lôr riscat culturâl e no, come che al è stât in chescj cent e trente agns di colonizazion, la nestre plui grande tragjedie. Cu la benedizion de glesie e cu la passion missionarie di tancj mestris furlans deventâts i prins traditôrs e nemîs dal lôr popul. Che Diu ur perdoni se al rive” (une Scuele pai furlans, p. 14).
Se o ves di pinelâ intun cuadri chest vincjedoi di Mai, o fasarès il sevêr palaç Antonini cui balcons furnîts di violis di zardin zalis e blu; in cîl une acuile che e svole no dome simbul dal Friûl ma reincarnazion simboliche di pre Antoni; sore dal puarton o scrivarès: “Culì: identitât te relazion”e fûr te plaçute students-studentessis di ogni nazion e colôr.
Un auguri di bon lavôr e furtune al gnûf Retôr magnific, la prof.e Cristiana Compagno di riunde cjargnele.
Pre Antoni, come che a disevin, la lauree honoris causa le à cjapade de int; i augurìn a la Universitât dal Friûl che impegnantsi pe nestre liberazion integrâl, e puedi, come pre Antoni, ricevi dal popul cussientizât e liberât une mertade, grande, biele lauree ad honorem. E valarès plui di cualsiasi ricognossiment di Rome.