A son nûf su dîs chei che lu capissin, ancje se mancul dal 10% dîs lu scrîf ben
Se no bastin i studis che lu disin di agns incà, o vin vude une gnove conferme di un dât che al è sot i voi di ducj, ancje se tancj lu dinein o a àn miôr sierâ i voi: la lenghe furlane e esist e e je ancjemò ben inlidrisade tes nestris comunitâts. No sarà tant in salût, ma no je nancje muribonde se e lasse olme di se fintremai tai zovins. O fevelìn dai risultâts dal ultin scandai curât de Lavagne Plurilengâl, cuntune fotografie linguistiche che e à mostrât a clâr cemût che la lenghe furlane, dopo di chê taliane, e sedi chê plui cognossude e fevelade dai zovins intervistâts, cuntun ûs massim in famee (55,1%), che al cale cui amîs (36,6%) e che al rive al so minim cui compagns di scuele (18,6%). Se o volìn cjalâ la tace mieze plene, o fevelìn dut câs di metât dai intervistâts che al dopre dome o ancje il furlan in cjase, e plui di un tierç dal campion che lu fâs cui amîs. Ancje chi, o vin istitûts plui o mancul virtuôs, cun situazions diviersis ma che a metin di solit insom de liste il Paschini-Linussio di Tumieç e il Magrini-Marchetti di Glemone, e da pît il Marinelli di Udin.
Se o cjalìn lis autovalutazions di competence, plui di 1/3 di lôr al à declarât di capî benon il furlan, e in totâl – tignint cont ancje dal nivel intermedi e principiant – a son adiriture cuasi 9 fantats su 10 che lu capissin; il 75% dal campion al declare ancje une cualchi competence te comprension de lenghe scrite. Par chel che al tocje il fevelâ, chei che a declarin un nivel avanzât a son dome 2 su 10, ma istès al risulte un bacin di locutôrs che al cjape dentri il 77% dal campion. La situazion plui grivie – ma spietade – e je dal sigûr chê de lenghe scrite: dome mancul di un student su 10 al declare une capacitât otime di scriture dal furlan (totâl des competencis 61%), e ben 4 su 10 a disin di no savê scrivi gran.
Insome, o vin la conferme che il furlan al è inmò ben presint almancul tant che lenghe passive intune percentuâl une vore alte – che tantis lenghis minorizadis nus invidiin pardabon! – e che duncje no son justificadis lis sieltis di trascurâ il furlan in favôr di un magri 12,3% che al declare di no cognossi cheste lenghe. ❚
