I rilêfs rupestris assîrs di Faida, puartâts ae lûs de mission furlane-curde dopo di une ricognizion archeologjiche di superficie durade 4 agns cul jutori des imagjins satelitârs, a son une vore rârs. I ultins, prime di chescj, a forin scuvierts te metât dal Votcent. Chest incredibil complès di voris di art unichis tal mont, fatis fâ tal VIII-VII secul prime di Crist, al è part, però, di un senari post belic, menaçât dal vandalisim e dal slargjâsi de vile dongje e des sôs ativitâts produtivis (in particolâr un arlevament di poleçs e une fabriche di modons) che a àn puartât a ruvinâ, par trascurance, une part dai rilêfs. «I curdis a àn madurît un grant sens di apartignince al lôr popul, a àn une fuarte identitât, e duncje i tegnin al lôr patrimoni storic-artistic, ma – e conte Katia – no àn masse atenzion tal cjapâsi cure di chel e a son un pôc impreparâts».
Il progjet cu la Universitât di Udin, duncje, nol smire “dome” a discuvierzi i rilêfs (tal 2019 indi son stâts sgjavâts 10, ma altris a spietin di jessi individuâts e mostrâts), ma ancje a documentâju cun tecnologjiis inovativis e a protezi chest sît ecezionâl. «Pal avignî si pense ae creazion di un parc archeologjic viert al turisim irakian e internazionâl, par pandi la cognossince dai rilêfs e permeti une lôr protezion plui juste. Cumò ju vin tornâts a cuvierzi di tiere, cu lis protezions dovudis».
Intal Kurdistan irakian la ceramolighe furlane e je ancje responsabile di cantîr. Ma une femine che e dirêç oms (di 4 a 15 tal câs di Katia), no ven mai acetade dal dut (no dome ta chei Paîs, a dî il vêr). «O ai vût grues problemis cuntun operari, no i leve jù che une femine i disès ce fâ, ma al jere il fi dal imam de vile e no vin podût mandâlu vie, pensant che no varessin vude vite facile dopo. Pal rest, tes citâts si movisi cence dificoltât, pûr cun cualchi atenzion tal vistisî, ma cence dovê puartâ vêi, e tes vilis o jentrìn ogni tant in relazion, simpri une vore positive, cui operaris che a lavorin tai nestris cantîrs e che nus invidin a fâ gulizion tes lôr cjasis. Mai, però, cu lis lôr feminis, chês a stan intune altre stanzie, al massim nus puartin il mangjâ». ❚
