Dal Schisme di Ocident e de Vuere dai Cent Agns
La Europe che e jes fûr dal Millennium de Ete di Mieç e sta cambiant muse, e svelte. Se o volessin segnâ suntune lavagne – propit come che si fâs a scuele – lis datis che a fasin di cerniere jenfri i doi periodis, o podaressin segnâ il 1409, l’an dal gran Consei di Cividât, là che un pape che al veve cjapât il non di Gregori XII, al secul Agnul Correr, al cirì di risolvi il probleme dal Grant Schisme di Ocident, che al durave bielzà dal 1377 e che al viodeve un Pape francês in France, a Avignon, e chel altri talian a Rome. E al pensà di fâlu propit in Friûl, metintsi tal mieç des rivalitâts dai doi grancj partîts dal moment, ven a stâi chel pro Vignesie, rapresentât di Udin, e chel pro Imperi, che al cjatave in Cividât la sô bandiere. Sielzint la bande imperiâl, e provant a imagjinâsi – cemût che o varìn mût di contâle – une glesie umanistiche, rinovade, gnove, epûr braurose de sô identitât. Cheste crevadure si sarès medeade dome intal 1417, cuant che a Costance si decidarà di tornâ sot di une sole ale, chê romane (magari cussì no). Intant, la Ingletiere e la France a stan ancjemò scombatint une vuere che e je tacade intal 1347, l’an de Peste Nere, e che si fermarà dome intal 1453: la famose vuere dai Cent Agns, che une volte finide si podarà fevelâ pe prime volte di Stâts nazionâi; di in chê volte, i Francês a saran rezûts di un re francês e i Inglês di un re inglês. Cussì almancul nus contin i manuâi di storie, dismenteantsi (o forsit no je une vere e propite amnesie, se mai une sielte storiografiche precise) des soferencis di chei popui che a son stâts obleâts a riverî un stât che nol coincideve cu la lôr nazion, e o pensi in particolâr ai Galês, ai Cornish e ai Irlandês pe Ingletiere (il probleme de Scozie al sarès vignût fûr dome cualchi timp plui inlà, sot dal ream di Elisabete I), e ai Bretons pe France. La situazion de Spagne si sarès disvilupade intune dimension nazionalistiche fuartonone, judade di un integralisim catolic e roman sostignût des coronis di Leon, Castilie e Aragon e finît intal 1492 cu la distruzion dal Califât di Granada e la espulsion di ducj i no cristians, pene la persecuzion de Sante Incuisizion. Il 1453 al viôt ancje la tant famose “colade di Bisanzio”: l’Imperi roman dal Orient al ven ocupât dai Turcs che, un pôc par volte, tacant dal secul XIV, lu vevin ben strent intune smuarse, penetrant intai Balcans. In curt, tal 1463, l’ultin re cristian de Bosgne, Stjepan Tomaševicˇ, al sarès stât decapitât a Jajce par volontât dal Sultan Maomet II. E la Serenissime, in dut chest? Di simpri e veve bramade la disfate dai Bizantins, rivâi inte navigazion di chel mâr, l’Adriatic, che cun prepotence la Dominante e veve simpri clamât “Golf di Vignesie”, tant di imbastî adiriture une finte Crosade, intal 1204: no par deliberâ Jerusalem, ma pluitost par depredâ Costantinopoli. Cu lâ benedizion dal Pape di Rome, dal moment che nol cjalave ben il Patriarcje Bizantin, schismatic fin dal 1054. Atri che Serenissime: anime nere! ❚
