Sfuei Mensîl Furlan Indipendent
Archivi de Patrie

Come çus su la palade

Enos Costantin

Dai diamants nol nas nuie, dal ledan a nassin lis rosis:
vite, muart e soredut miracui
dal fertilizant plui naturâl e siôr che al esist

Lis brauris di une volte: mostre di vacjis, agns Sessante, li dal Circul agrari di Glemone (Archivi storic di Cjase Cocel, Feagne)
Lis brauris di une volte: mostre di vacjis, agns Sessante, li dal Circul agrari di Glemone (Archivi storic di Cjase Cocel, Feagne)

Al è un miscliç di buiace, pissoc e scjernum. Cussì te tiere al devente un humus perfet, tant di mantignî la fertilitât tal timp. Cence humus la tiere e je simpri plui dure di lavorâ e e patìs simpri di plui il sut. L’avignî dal mangjâ al è li.

Se cualchidun nol à capît ce che al è chel miscliç jal dîs jo: al è il ledan. La buiace no si viôt par television, ma us al dîs jo ce che e je: une torte (pete tal furlan che no si dopre plui). Une vacje (o sin daûr a fevelâ di vacjis, ce crodeviso?) e fâs 12 tortis in dì. Il scjernum al è fat cun paie, patùs, stranc, fueis, foiêt, frint, lescje, sorgjâl, ce che al covente par un jet sut che al à di supâ, tant di imbombâsi pulît, la spissulade di licuit colôr dal aur.

Il ledan si metilu tal ledanâr, che si clame ancje “la cort”. Ce che pai talians al è il bearç dal re, pai furlans al è altri. Ma, come che al varès dite il Pup, nol è che cun chest i furlans a vuelin mancjâi di rispiet… aes vacjis!

Se la cort e je piçule, o pûr si fasile te braide, sul cjaveçâl, intun sflic pustot, sot di un morâr, alore si clamile “mussulin”. Cheste peraule si cjatile ancje tal vocabolari furlan dal 1871 (il Pirona “vieri”). E vignarà di “musse” che e vûl dî “côl”, “cavol” e, une volte, ancje “onde grande”.

Nol covente cuissà ce algoritmi par vê cuatri numars: lis 12 tortis (buiacis) che si diseve, a àn ognidune un diametri medi di 30 cm, tant di cuvierzi un metri cuadri. A son 40 kg in dì e 1,3 mc al mês. Il nitrogjen (o azot), l’element principâl (tal sens di Mendeleyev) pe cressite des plantis che si cjate te buiace di une vacje al è di 83 kg ad an.

L’azot che si cjate tal ledan madûr, chel che si bute tal cjamp, al è mieç kg par cuintâl. Nuie se si sa che la uree, un concim industriâl, a ‘nd à 46 kg par cuintâl.

Sì, ma la uree si fâs cul petroli o cul gas di Putin. Il cost energjetic di un kg di azot industriâl, chel de uree, al è l’ecuivalent di doi litris di gasoli. Cussì, se intun cjamp di blave si bute, come che si bute, 400 kg di azot industriâl, al è come dî che mi coste 800 litris di gasoli. Nome par un concim! Figurìnsi dut il rest (moviments di tratôrs e camions, altris concims, trataments di diserbants e velens…).

E cumò, frutats, viodìn l’avignî, chel cul soreli simpri plui paian.

Timp o tart, il petroli e il gas di Putin a vignaran a mancjâ. O a saran masse cjârs par doprâju par fâ uree agricule.

E alore e sarà sante scugne tornâ a doprâ il ledan, ancje parcè che il ledan nus da l’humus (fertilitât “complete”, no nome chimiche), intant che la uree nus da nome poluzion des aghis soteraniis.

Doprâ il ledan? Cuâl? No ‘nd è di bot plui. Vacjis a ‘nd è restadis une grampute in confront di ce che a jerin. Chei cuatri contadins che lu fasin ancjemò a son perseguitâts de burocrazie igjenichesanitarie come se a fossin manigolts, e tancj alevaments invezit di fâ ledan a fasin un sbrudiot penç cence scjernum che nol nûl di sigûr di Bacò.

Tant, a di nissun no i interesse nuie. La agriculture furlane (blave, soie) no da di mangjâ ai furlans, ma a purcits lontans. Si fevele nome di “ecelencis dal teritori”, come se si ves di mangjâ “ecelencis” di gulizion, gustâ e cene. Cence par altri savê cualis che a son chestis ecelencis.

In Friûl o varessin dut ce che al covente par dâ di mangjâ ai furlans. Cumò i prâts a son sparîts, ma a puedin tornâ pes vacjis, pal formadi cu la crodie edibile, pe spongje plene di vitaminis liposolubilis, pal ledan che al colte la jerbe e lis blavis, tant di sierâ il cercli dal azot che cussì nol va te aghe di bevi. E o vin tieris plui che avonde par fâ fasûi, piçûi, lints, lintosis, pire grande, pire piçule, pire spelte, siale, vene, mei, sarasin. Insome, dutis lis blavis e ducj i liùms par bestiis e cristians.

A ‘nt coventino tropis par rivâ fin li? Al covente che la politiche si dismovi, ce discors, ma al covente soredut che i furlans, chei che a vadin inçussîts daûr de publicitât e che si folcjin dentri dai centris comerciâi, a domandin il prodot furlan, fat chenti, bon e san.

Se je la domande e je ancje la ufierte, tant par fevelâ “economic”.

Se no, o restìn come çus su la palade: svuarbâts de lûs, chê dai supermarcjâts. ❚

 

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +