Une esperience pardabon uniche e emozionante. Une volte ad an, si pues lâ a cjapâ messe in lenghe furlane inte suaze dal Domo di Milan, une des glesiis plui innomenadis dal mont.
Une robe che no san ducj, magari cussì no, e che si fâs la tierce domenie di Dicembar, chest an ai 15.
Le organize il Fogolâr Furlan di Milan, simpri presint cuntun trop di lôr vistûts cui costums tradizionâi furlans a compagnâ la jentrade di cui che al funzione. Ospits par dî la Messe, predis furlans: par chi a son passâts bonsignôr Duilio Coronali, bonsignôr Loris della Pietra diretôr dal Seminari interdiocesan di Cjastelîr di Pagnà, bonsignôr Lucio Soravito vescul de Glesie di Adrie-Rovigo che al è mancjât chest Istât.
Chest an la emozion par nô di La Patrie dal Friûl e je dople parcè che a dî messe al sarà pre Roman Michelot di Glesie Furlane, che i letôrs a cognossin ben stant che al è ancje un nestri editorialist. A compagnâlu, il Grup Corâl Vôs di Vilegnove che vie pe celebrazion al fasarà cjants di tradizion patriarchine furlane. Dentri dal repertori a saran ancje un cjant di Jacopo Tomadini e un cjant corâl di Bach voltât par furlan.
Une curiositât e je che la messe si fâs cul rît ambrosian e no cun chel latin, e cussì pre Roman al varà di studiâ un tic. Cualchidune des particolaritâts di chest rît a son che il scambi de pâs si fâs prime dal ofertori, lis particulis si crevin prime dal Pari Nestri e i letôrs a domandin la benedizion al predi prime di ogni leture, ancje dai salms.
Apontament duncje in Domo a misdì e mieç (12.30). Une racomandazion: miôr rivâ une orute prime parcè che cumò, dopo dal Expo, la glesie grande di Milan e je deventade un atrat turistic mai come prime, e lis filis par jentrâ a son grandis. Chei che a jentrin a vegnin controlâts ducj, ancje chei che a van a cjapâ messe. Se no si puarte la borse, si sparagnisi cualchi minût di spiete. Un sacrifici che, us sigurìn, al vâl la pene: se par câs o vês in program une gjite a Milan, o varês une robe in plui ce contâ a cjase, e pardabon biele. ❚
Dree Venier
