Un romanç zâl a pontadis, che lant daûr aes olmis di une sparizion, nus puartarà dentri un mont pôc contât e fûr mode: chel di ogni dì. I cjatarìn operaris e parons, ma ancje puestins e operadôrs sociâi, ducj a fâ i conts cun cheste ere di precarietât esistenziâl dulà che jessi amì di “chel just” al è dispès plui impuartant di savê costruî un mont cuntune clâf a stele, ma dulà che al resist ancjemò cualchidun bon di rinunziâ a dut par fâ slusî un tic di veretât.
Il pari al veve picjade intal puest di onôr de sô taverne une sô foto, di zovin, cu la bandiere patriarcjâl a une manifestazion dal Moviment Friûl pe Universitât, e Fortunât al veve riscjât di clamâsi “Ramacul” ae anagrafe. La mari, però, si jere metude di mieç e, dal moment che ancje jê e veve fat il ‘68, l’om al veve scugnût cedi, e si jere contentât di clamâlu come il diacun Fortunât, lassant cuiet tant il vescul Ramacul che la femine.
La Universitât ae fin e jere stade fate, ma Fortunât nol veve vût chê di studiâ. Dopo dal Malignani al veve fat un cors di saldadôr, e daspò si jere metût di bessôl a fâ il fari. Scjalis, portons, librariis, robe di fin. Al veve un piçul capanon juste fûr dal borc dulà che dopo dal taramot a jerin vignudis sù un frac di vilutis, e tra chês la sô.
Mi ven incuintri netant une clâf a stele cuntun peçot, e o resti a viodi la muse secje, i voi cerclâts.
«Oh, viôt cui che al è!», mi fâs, prin di pocâmi la schene cun chês mans come martiei.
Si sentìn difûr, suntun pâr di bancâi, parcè che nol è il câs di menâ Lucio intun puest plen di robe che, se no taie, e sbuse o e bruse.
«Ce mi contistu?», o domandi.
«Eh, nuie ben…», al tache. «Lavôr a ‘nd è, ancje masse, ma la int mi paie dopo mês e jo intant par cjoli il materiâl o voi sot in bancje. No rivi plui a stâi dentri, fâ debits cu la bancje no je robe par me. E po, lis tassis! In curt, o moli dut e o voi sot paron».
«Mi displâs…».
«Eh, cussì po… la crisi. E di te, cemût?».
I conti di Kosim. Lui al cognòs la CAMIN parcè che ogni tant si fasevin fâ di lui cualchi toc. I veve ancje dit a Kosim di lâ a vore cun lui, ma il rumen nol veve volût. Considerant che Fortunât al stave par sierâ, al veve fat ben. O magari no.
«Kosim nol leve cun chê frute. Nancje pal as di cope: chê e jere la sdrondine di Pieri, lu san ducj. Sâstu de multe? Pieri al jere ator in machine cuntune zovine, e si è fat brincâ di un autovelox. Ma par no fâi savê nuie ae femine, i à domandât a Kosim di cjapâ la colpe. Beh, chê zovine e jere propit chê cravuate alì!».
«Dîstu pardabon?».
Fortunât al rît e al mostre i dincj macolâts di masse spagnolets.
«Sigûr! Pieri Renturin al è un can dal osti, un purcit. Sâstu cemût che al va indenant? Al tire tacons che tant i dan istès lavôr midiant di chel zîr di predis che al à. Mi voleve tirâ dentri ancje me, cun… Comunione e alc… ce saio jo. Ce si clamino?».
«Nuova Eucarestia?».
«Esat, comunion… eucarestie… chê mierde alì. “Ven cun nô”, al à dit, “e ti cumbini dut il lavôr che tu vûs”. Al à i amiuts tra i dirigjents de Rivellini o de Micheli, âstu capît? Lui al vinç i apalts, e chei altris a roseâ la crodie. Porcon lui, la sô clape e il lôr diu! Pluitost o voi in Svuizare li di gno barbe, che sta sot di lui. Pense che cumò al vierç ditis tal forest, e chei che a lavorin ae CAMIN a son assumûts là jù. Dut par sparagnâ su contribûts e tassis, e par licenziâ cence storiis. Se lu brinchin, al fâs un altri faliment e nol tire fûr un franc, che tant dut al è intestât ae femine. Âstu savût dal asîl? Dut un zîr di bêçs par contentâ int di là jù, fâ rivâ alc ai polizais e a cualchi sindic, e tignî cuiet il mont. Cemût che lu sai? Mal à dit Pieri! Cui po, se no? Si vante, al fâs il bulo, che tant nissun lu tocje».
Alc o savevi. Ancje cun me si vantave di vê chel e chel altri amì plaçât chi e là.
«Fâs cont, ‘Sef, che ogni an al risulte in pierdite, e nol paie un franc di tassis. Però al fâs sù il capanon gnûf cui contribûts de Regjon».
«A son agns che lu dîs…».
«Vere, ma la setemane passade il sindic al à firmade une deroghe dute di presse. Doman a butin lis fondis».
(9, al va indevant)
Igor Londero
