SLOVENIE. Ambassadôrs turistics in vore sui social

E je daûr a vê un sucès enormi la campagne promozionâl “ifeelsLOVEnia, doi milions di motîfs par amâ la Slovenie” jessude sui social – e midiant dal portâl principâl www.slovenia.info – in graciis dal Ent dal turisim sloven STO (Slovenska turiscjcˇna organizacija). L’Ent al à invidât i slovens a condividi su Facebook, Instagram, Twitter e Youtube lis propriis esperiencis e i lûcs preferîts, se pussibil acompagnant i post cun fotografiis o videos, doprant l’ashtag #ifeelsLOVEnia, za di timp sielzût de STO par promovi lis bielecis de Slovenie e afermâle tant che destinazion turistiche verde, sane e ative, che e ufrìs esperiencis a 5 stelis. L’obietîf al è chel di rivâ a doi milions di post cjapant dentri il numar plui grant di visitadôrs potenziâi, presentantjur ancje lis localitâts plui platadis o mancul cognossudis.
Prime dal lanç de campagne intal Jugn passât, su lis rêts social a jerin plui o mancul 400 mil post cul hashtag #ifeelsLOVEnia: dopo cirche siet mês si è rivâts ae milionesime condivision. Intai prins siet mês, cun di plui, lis esperiencis condividudis cul hashtag promozionâl a son rivadis a plui o mancul 133 milions di utents web, ogni dì a son stâts publicâts in medie plui di 2.800 post, intant che lis interazions cu lis fotografiis e i videos a àn passât i 14 milions.
La campagne – che inte Sierade passade e je stade definide tant che miôr iniziative promozionâl sul social media di bande de SEMPL Media Trends Conference, meretantsi il ricognossiment Sempler di aur – e va indevant ancje chest an. Intal prin trimestri e je stade dedicade soredut ae Slovenie alpine – la STO e vûl di fat presentâ chest an dutis 4 lis macrodestinazions slovenis -, fasint cognossi setemane par setemane lis singulis areis. Cussì, tra il 18 e il 24 di Març, la campagne si è par esempli incentrade su la alte val dal Lusinç e duncje su la fasse che e confine cu la provincie di Udin e sui comuns che plui a colaborin cun chei vicinants de nestre regjon. La alte val dal Lusinç e ven presentade intal ambit de campagne tant che une val di ativitâts, festivai, scuviertis, adate ai sports acuatics, plene di trois tematics e di testemoneancis storichis de grande vuere. Inte sezion “cjantons scuindûts” al ven presentât invezit il Kanin, la Mont Cjanine, impuartante ancje pal disvilup turistic trasfrontalîr. Intant lis condivisions dai “ambassadôrs turistics slovens” cul hashtag “#ifeelsLOVEnia”, stant al contadôr sul portâl www.slovenia.info, a son za plui di 1.252.000. ❚
Tjaša Gruden