Gurize, capitâl dal Friûl di Soreli jevât fin dal 1001

Gurize e je la capitâl dal Friûl di Soreli jevât, documentade fin dal 1001 cuant che l’imperadôr gjermanic,
Oton III, le à donade al patriarcje di Aquilee.
Une citât antighe, duncje, che e fâs part ad implen de comunitât plui largje dai comuns de regjon dulà che si fevele il furlan.
La impuartance di Gurize pe identitât furlane e je documentade di secui.
Ae fin dal 1700, il protomiedi gurizan, Antonio Musnig,
al meteve in evidence cemût che i citadins di Gurize
a fasessin ûs di trê fevelis: sloven, todesc e furlan.
E a Gurize, intal 1829 (190 agns indaûr), al è nassût Graziadio Isaia Ascoli, il glotolic talian plui famôs. Dopo, intal 1919 (100 agns indaûr) e je stade costituide propit achì la Societât Filologjiche Furlane.
Ascoli al è cressût intun ambient poliglot dulà che, dongje dal furlan e dal talian, si fevelave ancje il sloven e il todesc. Al à cognossût, tra chei altris, l’abât udinês Jacopo Pirona (l’autôr dal prin Vocabolari furlan), e a chel i à dedicât il so prin saç di argoment linguistic.
Trasferît a Milan, intal 1873
al à fondât la riviste dal Archivio Glottologico Italiano e tal prin numar al à publicât i “Saggi ladini”, là che, pe prime volte, a vegnin delineadis la identitât e la specificitât de lenghe furlane e di chês altris fevelis ladinis. Al è stât un tra i prins studiôs a ricognossi il valôr formatîf dal plurilinguisim, soredut intun teritori tant che il Friûl, che di simpri al è une crosere di popui, di lenghis e di culturis. Un valôr che, ancjemò vuê, la Fieste de Patrie dal Friûl e vûl celebrâ. ❚
par cure de redazion