la gabe di Terna ai furlans
In Friûl-Vignesie Julie, par plui di cualchidun, svilup al fâs rime cun deregulation e cimentificazion. Su la fonde di cheste convinzion, il Consei regjonâl, ai 5 di Avrîl passât, al à aprovât la propueste di leç regjonâl 26, cognossude tant che “leç omnibus”.
✽✽ I fins dal proviodiment a son chei dal “recupar de competitivitât regjonâl” e de “razionalizazion dal ûs sostignibil dal teritori”, te pratiche tradusûts cu la concession di une grande libertât di costruzion pai privâts a discapit des competencis urbanistichis dai Comuns. Une prove di centralisim dal dut incoerente cu la autonomie de nestre Regjon. La leç, di fat, e introdûs la pussibilitât di derogâ ai struments urbanistics e regolaments edilizis comunâi, gjavant al Consei comunâl il podê di decidi sui temis di planificazion e programazion teritoriâl. Cussì – tant par fâ dome un esempli – struturis alberghieris e esercizis di soministrazion a varan la pussibilitât di ampliâ, ancje in deroghe aes distancis, aes altecis, aes superficiis o ai volums previodûts dai struments urbanistics e dai regolaments edilizis comunâi, fin al 50% des superficiis esistentis intal câs di realizazion di centris pal benstâ, pissinis, saunis, locâi pal tratament di bielece e relax, fintremai a une distance di 500 metris dal edifici esistent.
✽✽ Duncje, pai promotôrs dal proviodiment, par fâ cressi economichementri la regjon la soluzion a son lis coladis di ciment. Ben savint (si spere) che la tiere e je une risorse limitade e no rinovabile. Pôcs sorestants a somein jessi cussients di chest fat, stant che il Friûl-Vignesie Julie – lu dîs il rapuart 2019 dal Ispra, l’Istitût superiôr pe protezion e la ricercje ambientâl – e je la cuinte regjon in Italie par consum di teren, cuntun tindince in cressite. No ise ore di fermâsi? No ise ore di cambiâ prospetive? Par nô, pai nestris fîs, par chei che a vignaran. Lu vin dit dispès su lis pagjinis da La Patrie dal Friûl. Il câs dal eletrodot Udin Ovest-Redipulie al è emblematic. Lait a cjalâ, te inchieste di chest numar, ce biel servizi che al è stât fat al nestri teritori permetint di tirâ sù cheste infrastruture, che lu ferìs mortalmentri cence nancje ripaiâ (dut câs, mai avonde) lis comunitâts pal lôr sacrifici. No saran dal sigûr lis prescrizions de Sorintendence – che par altri e veve dât parê negatîf al eletrodot aeri – pes previodudis oparis di slizeriment dal impat paisagjistic, a sanâ la situazion. E pensâ che la soluzion alternative – la linie eletriche sot tiere – e jere.
✽✽ Cuant le capirano i nestris aministradôrs che no si è contraris al svilup e aes infrastruturis se si domande di rispietâ il teritori e lis sôs carateristichis ambientâls e paisagjistichis, i siei borcs che a contin la nestre storie, la nestre culture, ce che o sin e ce che o sarìn bogns di deventâ?! Coventavie derogâ ai struments urbanistics dai Comuns? Struments che a son pensâts par un disvilup armoniôs, intal rispiet des diviersis esigjencis dal citadin, ma inte tutele dai dirits coletîfs. Ta cheste maniere – tant che e à marcât Paola Schneider, presidente regjonâl di Federalberghi – «si lasse man libare a societâts di capitâi, grups imobiliârs, costrutôrs e speculadôrs cun grancj apetits bande dal nestri teritori». E i sindics no podaran fâ nie.
✽✽ Altri che benefici pes comunitâts! Il Progrès, ta cheste regjon, al è ancjemò lontan. ❚
Erika Adami
