SLOVENIE. Un altri cambi intal guvier. Si dimet il ministri de culture

Il guvier di Marjan Šarec, insediât tal Setembar passât, al à di sostituî za il secont component dal esecutîf. Dopo Marko Bandelli, titulâr de deleghe aes politichis di coesion e di disvilup, costret aes dimissions a Novembar, l’esecutîf sloven al piert il ministri de culture Dejan Prešicˇek che al à partecipât di pôc tant che oratôr principâl al tradizionâl incuintri di principi an dai slovens de provincie di Udin e de Alte Val dal Lusinç a Tulmin.
A discjadenâ la polemiche che e à cjapât il dibatiment public intes ultimis setemanis di Zenâr, il suicidi di un dipendent dal ministeri de culture. Dopo chest acjadiment, sui media a son saltadis fûr lis tantis denunziis di molestament tal puest di vore (ben 74) dai dipendents dal dicasteri de culture, che a rimontin, però, al mandât di prime. Il stes Prešicˇek al è stât acusât di plui bandis di no vê un rapuart rivuardôs viers dai dipendents che a saressin stâts invezit vitimis di umiliazions, pressions continuis e maltrataments. Prešicˇek, incolpât ancje di vê doprât in maniere improprie la machine di servizi, fasint traspuartâ nûf voltis i propris struments musicâi dal ministeri al conservatori dulà che al insegne musiche, al à dineât di vê maltratât i dipendents, ma al à decidût ae fin di ufrî al prin ministri lis propriis dimissions par no prejudicâ il lavôr dal ministeri stes e chel di chei che a operin intal mont de culture, setôr che a chel, propit intal assestament resint di belanç, pe prime volte dal 2012, a vignivin destinadis plui risorsis.
A domandâ cun decision al prin ministri di sostituî il ministri Prešicˇek – che al à vût, però, di altris bandis ancje tantis espressions di poie – al è stât ancje il sindicât dai dipendents dal ministeri. Ae fin, il prin ministri Šarec al à decidût di acetâ lis dimissions di Prešicˇek e al à rimetût in maniere temporanie (par trê mês o fin ae nomine di un gnûf candidât) al ministri di cumò de istruzion Jernej Pikalo ancje la vuide dal dicasteri de culture. Si spiete cumò dai socialdemocratics, compagns di coalizion e partît che Pikalo al è vicepresident, la indicazion dal gnûf candidât. ❚
Tjaša Gruden