(L)INT FURLANE. Furlans pe Europe

✽✽ Dispès o sin masse impegnâts a difindi, a proponi la nestre idee autonomiste, di autodeterminazion pal popul furlan, che o corìn il pericul di dismenteâ il parcè di cheste bataie. I atacs si tornin simpri a presentâ e, cuasi ogni dì, si cjatìn impegnâts a bataiâ cuintri i tentatîfs di strenzi i spazis indulà movisi. I esemplis a son tancj: si va dal asset istituzionâl che cun chel si prove a anulâ di un pont di viste gjeografic il Friûl, midiant di un svuacet aministratîf, a chel culturâl dulà che la lenghe e ven calcolade un aspiet folcloristic, intimist e no invezit chel element primari e che al sburte une comunitât.
✽✽ Si cjatìn duncje obleâts a difindi cui dincj chei pôcs spazis concui-stâts, chês leçs che o vin cun fature gjavadis fûr al centralisim roman e regjonâl. Chest sfuarç continui al esaurìs lis fuarcis, al semene sfiducie e pessimisim, nus ridûs a une sumission di timps devant de machine poderose di vuere de propagande stataliste. No dome: in maniere incussiente, si ridusìn a calcolâ strategjiche la difese di chês avanvuardiis, concuistadis cun tante fature, e la resistence e somee la uniche strade percoribile.
✽✽ Che al sedi ben clâr che no dome e je juste e sacrisante cheste resistence, il difindi chel pôc che si è otignût, ma no podìn simpri stâ intal pantan de trincee, in spiete di une gnove canonade, sperant che no sedi chê definitive.
✽✽ Cjalâ di là dal fîl spinât al vûl dî interogâsi sul parcè che o volìn la autonomie, cemût che o volìn aplicâle, ce che e significhe autodeterminazion viers di chel stât che, che si vueli o no, o fasìn part. A son domandis che o scugnìn fâsi no par curiositât inteletuâl e nancje in maniere teoriche, parcè che dome des rispuestis che o sarìn in stât di ufrî e pues nassi chê propueste che e slargje l’orizont de politiche furlaniste.
✽✽ Duncje, si trate di unî la ativitât concrete di denunzie, la pussibilitât, ancje cheste concrete, di soluzions diviersis di chês proponudis dai atuâi, ma ancje passâts, governants, ae vision di un popul furlan che al vûl ritaiâsi il so puest, il so toc di storie inte assemblee plui ample de Europe.
✽✽ In sintesi: o volìn autodeterminâsi par jessi parons dal nestri destin, par afermâ che chest al è un dirit inalienabil. Par dîle in pocjis peraulis: parcè che o volìn che in futûr si vivi miôr.
✽✽ Chest “Sium di une robe”, al disarès Pasolini, al è dai furlans par vie de storie di cheste tiere, par chel Patriarcjât di Aquilee, fâr di civiltât, che nol è nostalgjie dal passât, ma sperance, invît a un futûr di convivence, di integrazion e democrazie.❚
Dree Valcic