Bibie: Riviodudis la grafie de lenghe, la vieste grafiche e il formât

A 25 agns de publicazion de edizion in vot volums e a 20 de jessude intun unic, e à viodût la lûs la gnove edizion da “La Bibie” in lenghe furlane, rinovade inte vieste grafiche e intal formât e riviodude inte grafie de lenghe furlane daûr des normis uficializadis de leç regjonâl 29 dal 2007. La gnove edizion e ven incuintri aes tantis domandis di chescj agns, dopo che la precedente e jere aromai esauride.
A curâ l’adatament de grafie al è stât pre Roman Michelot di Glesie Furlane, cu la consulence di pre Loris Della Pietra, diretôr dal Ufici liturgjic diocesan, e di Gabriele Zanello, docent di Lenghe e Leterature furlane de Universitât dal Friûl.
La riproduzion dai mosaics de Basiliche di Aquilee cu lis storiis di Jone su la custodie dal volum e je stade sielte dal editôr, l’Istitût Pio Paschini pe storie de Glesie in Friûl, par visâsi di cualis che a son lis origjins dal cristianisim in tiere furlane e une des componentis fondamentâls di une identitât che no vûl jessi esclusive, ma vierte viers di ducj.
Cun cheste gnove edizion, si à volût ancje memoreâ doi oms di Glesie e di culture – pre Checo Placerean (1920-1986) e pre Antoni Beline (1941-2007) – che, in prime persone e cul jutori di altris di lôr, a àn sfadiât une vore par rivâ ae version integrâl de Bibie par furlan, che e fo aprovade cul decret de Conference episcopâl taliane.
Ae presentazion de gnove Bibie, il prin di Fevrâr inte sale Paolino di Aquilee a Udin, il gardenâl Gualtiero Bassetti, president de Cei, si è cjapât l’impegn di dâ cors ae aprovazion dal Messâl in lenghe furlane che al è pront di agns, ma ancjemò nol à vût l’imprimatur dal Vatican. Intai lôr salûts, sedi il vicepresident de Regjon Riccardo Riccardi che il sindic di Udin Pietro Fontanini a vevin solecitât in merit il president de Cei, che al à rispuindût: «E je une robe dovude, ma prime si varà di lâ indevant cu la riforme di chel talian». Vignarà ben chel moment, ma cuissà cuant. ❚
par cure de redazion