Patrizia Pavatti – Cui che e je

La sô designazion a diretore dal Ufici scolastic regjonâl e à metût dacuardi ducj, ma propit ducj. Patrizia Pavatti di fat e à une competence professionâl comprovade, che intai agns e je passade de programazion europeane, al coordenament dal disvilup dai progjets sul plurilinguisim, fintremai ae realizazion di iniziativis di integrazion dai sistemis scolastics, de mobilitât dai students e dai docents, e di lifelong learning, ven a stâi l’imparâ e l’inzornâsi tal cors di dut il percors di vite e di lavôr, che al è un dai obietîfs primaris de Union Europeane. La sô ultime fadie e je stade chê di dirigjente scolastiche tai ultins cuatri agns dal Convit “Paolo Diacono” di Cividât, une des scuelis plui innomenadis de regjon dulà che e à podût tocjâ cun man i problemis di ducj i ordins e i grâts de nestre scuele, des primariis aes superiôrs. ❚ (W.T.)