Sfuei Mensîl Furlan Indipendent
Archivi de Patrie

5. La albe de nestre Patrie

pre Josef Marchet e pre Checo Placerean

Grau
Grau e je la uniche isule abitade de regjon furlane, e no je furlane ni pôc ni trop; e si ten in bon di no jessi.
Che e vedi vût cualchi abitant prin dal 400 al pues ancje stâi, ma nol risulte.
Facil che lis primis staipis di palût a sein stadis fatis a Grau in chê volte che al rivà Atile a sdrumâ Aquilee. E no ducj chei siôrs aquileiês che a jerin scjampâts là jù, a tornarin indaûr dopo passât il burlaç: putrops di lôr no vevin plui cjase te citât e se faserin su la isule. Ma il grues al rivà là cuant che Aquilee e colà tes mans dai Langobarts. Si pues crodi che i prins a puartâ la pielate al sigûr a sein stâts i plui siôrs, i parons Latins – come simpri – cundut il patriarcje Paulin che al rivà adore di puartâsi daûr il tesaur de sô glesie. E chei no tornarin. In pôc timp une altre citât, cui siei palaçs e lis sôs glesiis e comparì su lis barenis: si tratave di siôrs! La cuistion dai “Trê Cjapitui” e finì cul dividi il patriarcjât: in Aquilee (o a Cividât) un patriarcje sismatic, favorît dai Langobarts; a Grau un patriarcje unît sot la protezion dai bizantins. Cussì lis dôs citâts a deventarin antagonistis: une “civîl” e une “barbariche”.
E la sbregadure no fo mai plui cuside. Intant che Aquilee e colave a flics, Grau al cresseve di impuartance e di autoritât; e jere la prime des isulis dal litorâl adriatic che a lavin popolantsi sot la dominazion bizantine. Ma la fieste no durà a lunc. Grau, nassût, si pues dî, des maseriis di Aquilee al jere destinât a fâsi scolâ di sanc de furbarie di Vignesie.
Tra la prepotence dai patriarcjis todescs di Aquilee che a volevin fâsi parons, e la politiche fine dai dôs di Vignesie, che le cjarinavin par tignîle buine, la isule e sielzè Vignesie. Cussì, par secui, intant che la Furlanie e fo une code dal mont gjermanic, Grau si tignì in bon di sei une ponte dal mont latin. Al pierdè dut, un pôc a la volte; al restà in man di patriarcjis natîfs di Vignesie, che lu guviernavin stant a Vignesie; al passà sot i conts nomenâts di Vignesie, che no judavin in nuie e no ju difindevin di nissun assalt; al sopuartà cjaristiis, epidemiis e incursions; si ridusè te plui nere miserie, di no podê nancje justâ il cuviert dal palaç dal cont: ma di tornâ a tacâsi al so çoc furlan nol fo mai câs. Cussì, vitime de sô stupide fedeltât a cui che in premi lu disvuedave di dut, si lassà puartâ vie ancje la sede patriarcjâl e dopo nol fo nuie plui che un grop di cjasis discrodeadis, di tamossis tiessudis di cjanusse, e un popul di pescjadôrs danâts a strussiâ la vite ta la aghe e tal pantan e a murî di stents prin da la ore. I restà la braure di clamâsi mari di Vignesie e di fevelâ un lengaç diferent dai “barbars” di tiere ferme.
Cividât
La grande ore di Cividât e fo tai ultins agns de dominazion langobarde.
“Forum Julii” no jere stade une grande citât: ce che al fo rincurât sgjavant il teren e che cumò si cjate tal Museu, al lasse capî che la “colonie” romane e veve di sei formade di puare int: salacor nome lis fameis dai soldâts che a jerin di presidi. E chês, cul rivâ dai Langobarts, a saran scomparidis: scjampadis o scjafoiadis.
E conte la liende che il re Albuin, rivât daûr di Cividât, si tirâ parsore di une mont a studiâ lis posizions. Par chê strade che al jere vignût lui, a podevin vignî dentri altris di lôr: i Avarics, metìn a dî. E cussì, par vê lis spalis siguris, Albuin al stabilì in Friûl il prin Ducât e a Cividât la capitâl.
I romans di Aquilee a scjamparin a Grau, chei di Concuardie a Cjaurlis; Zui, tal Cjanâl di Sant Pieri, restade sierade la strade de Mont di Crôs, al fo nome un sît bandonât, cence impuartance, e ancje il so vescul al vignì a stabilîsi a Cividât. Cul prin duche, Gjisulf, si fermarin te gnove Capitâl personalitâts e fameis des plui in viste e il ducât furlan al passà di man in man a personis di valôr. Passade la brute ore da la invasion avariche (cuant che al fo copât Gjisulf) so fi Grimoalt, che al jere rivât adore di salvâsi, al deventà re dai Langobarts e al tornà a meti in man a chei de sô famee il ducât.
Te prime metât dal Sietcent, al timp dal re Liutprant (1), ancje il patriarcje di Aquilee, Calist, che si cjatave a Cormons, al vignì a stabilîsi a Cividât, parant vie il vescul di Zui. In chê volte al jere duche Pemon: cun lui e cui siei fîs Ratchis e Aistolf, che a forin un daûr l’altri duchis dal Friûl e rês dai Langobarts (2), Cividât al deventà ancjemò plui impuartant e al fo ornât di monuments e oparis di art, che a restin ancjemò lis plui bielis di chel timp e di chel popul: baste cjalâ ce che al è tal Museu e il batisteri di Calist e l’altâr di Ratchis, che cumò a son in Domo.
Langobart de çocje di Gjisulf al fo il storic Pauli Zaul di Warnefrit (Paulus Diaconus), langobart al fo il patriarcje Sigualt, salacor de çocje dal re Grimoalt; e sant Anselm cugnât dal re Aistolf e, vadì, ancje il patriarcje sant Paulin.
Ma cheste e fo la ultime sflameade de potence langobarde. Aistolf e Desideri si urtarin cui papis e chescj a clamarin in jutori il re dai Francs, Carli il Grant. Dal 773 al rivà re Carli, al cjapà Pavie e po Verone, al fasè presonîr il re Desideri e si proclamà lui re dai Langobarts.
Il duche dal Friûl, Rotgaut, in chê volte si pleà cence fâ nissune resistence e al restà intal so puest, sot la paronance di Carli. Il gambiament di parons al jere za fat, cence conseguencis di nissune fate pai furlans.
I Langobarts si jerin aromai ducj messedâts cui antîcs abitants dal Friûl e a formavin un sôl popul. Il re Carli nol veve mudât nissun ordenament.
Ma il duche Rotgaut (3) no si tignì apaiât di vê molât in chê maniere denant di Carli; e in cunvigne cun so missêr Stabilin di Trevîs e vadì ancje cui duchis Arichis di Benevent e Ildebrant di Spolêt, a pene partît Carli da la Italie pe vuere di Sassonie, al pensà di rivielâsi. Il Patriarcje bizantin di Grau, Zuan, savude la cjosse, al spià dut al pape Adrian e il pape al visà Carli. Cussì, dal 776, Carli al tornà jù e, dopo un trement combatiment dulà che Rotgaut al restà copât, al cjapà Trevîs e Cividât e al fasè un maçalizi di chei Langobarts che si jerin rivielâts. Altris a ’ndi mandà vie lontans, altris a ’ndi metè in preson e ur cjolè dut ce che a vevin.
Ma nol mudà nuie tal ordenament dal ducât: nome che tal puest di Rotgaut al metè un dai siei umigns, Masseli. E par un pôcs di agns il ducât furlan al restà cussì sot dai Francs. Cividât al mudà il non vieri di “Forum Julii” in chel di “Civitas Austriae”. Muart il patriarcje Sigualt, Carli al mandà chenti sant Paulin che al jere so amì e che al vignì di triste voie, parcè che i plaseve di stâ cui umigns studiâts che il re Carli al veve tirâts dongje di ogni dontri.
NOTIS:
(1) 1 VIII secul.
(2) A son i duchis e i sovrans implicâts intune grande spiritualitât e devozion.
(3) Al jere stât lassât al so puest daspò la concuiste francje. Al met adun i duchis che a partignirin a la aree “tricapitoline” cuintri Carli il Grant.

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +