(L)INT FURLANE. Rompi l’assedi

Al è pôc ce scherçâ: o sin circondâts, e l’assalt finâl nol intardarà a rivâ. Il vôt dal Trentin e, par cierts viers ancje chel dal Sudtirôl, al à completade la formazion di chei che a assediin. Al ten, ancje se cun segnâi di indebiliment, il baluart de Volkspartei intes vals todescjis, ma, pal rest, nissun nol vignarà in socors de nestre autonomie.
Triest, cundut che e proclami unitât e specialitât regjonâl, fuarte de sô fuarce contratuâl rinovade detade dal disvilup dal puart, no môf dêt su lis competencis, se no concuardadis cun Lombardie e Venit. Chest al sucêt in ducj i setôrs, dal turisim ae scuele, de energjie ae sanitât.
Ma il virus de disgregazion – magari cussì no – al passe dentri dai nestris confins, e chest al sucêt cjolint vie gjeografie e storie. E no je cuistion dome di denominazions dai teritoris, ma di une campagne massice di disinformazion là che i tiermins Vignesie Julie o Venit orientâl, tant par fâ un esempli, a fuarce di jessi ripetûts in maniere cuasi ossessive, di falsetât si tramudin in veretâts, e in realtâts sinciradis.
Lis classis dirigjentis, de politiche ae economie, a àn fat fente di no acuarzisi di cemût che cheste tele di ragn e stes a planc fasint sù il Friûl, di cemût che i centris di comant a colassin cence fal in mans estraniis, justificant, in non di une globalizazion di no podê arestâ e “divine”, la svendite des nestris impresis, in cambi di un puest intai conseis di aministrazion.
La tiere, la aghe, la nestre salût a deventin marcjanziis di scambi par carieris ben paiadis, par un cidinôr compliç di une distruzion metodiche de nestre ricjece e de nestre identitât.
E a chest pont, cui pensaraial ancjemò che la autonomie e sedi un vantaç, che la specialitât e coventi pardabon a fâ lis robis miôr di chei altris? Tant al vâl finî intal cjalderon italic di chê republiche des bananis che e je daûr a nassi e che si profile al orizont.
Se ancje voaltris letôrs cjârs, le pensais cussì, o sin dal gjat, mangjâts e digjerîts. Nô, chest gjornâl, chei furlans che a crodin ancjemò inte dignitât di un popul, no i stin. ❚
Dree Valcic