INCHIESTE: SCUELE. Lenghe furlane in classe. Dispès no si le insegne o si le insegne mâl: fameis imbroiadis

A risi l’avignî dal furlan e la credibilitât dal sisteme scolastic
Inte situazion complicade de istruzion furlane, ce puest aie la aplicazion de leç che e previôt la pussibilitât di imparâ il furlan tes classis di scuele? Nol è ancjemò pussibil savê tropis fameis che a àn sielzût chest an di fâ valê la opzion facoltative che e permet di ativâ l’insegnament de marilenghe: ancje se l’Ufici scolastic regjonâl al varès di savêlu, nol pant i dâts, no si sa parcè. Tai ultins agns, dut câs, la dinamiche e je restade avonde buine e lis rilevazions des domandis des fameis a fevelin di 7 fantats furlans su 10 che a àn studiât furlan sui bancs dai lôr istitûts. Ma la cualitât di chest insegnament ise buine? Cemût vegnial insegnât?
Al è clâr che in ogni scuele si cjatarà une situazion diferente cun diferentis criticitâts: intai agns, dut câs, si sta cirint di fâ di dut par jessî de precarietât e par fâ deventâ struturâl, no un fat episodic o un fastidi, chest gnûf aspiet de didatiche. Tant si varès di lavorâ par dâ une rispueste buine a nivel di ufierte, ma dispès a vegnin segnaladis problematichis di tantis fatis. La prime, impussibile di dineâ e dipendente dal Ufici scolastic regjonâl (sotdimensionât e dipendent di Vignesie) e je chê peade ai problemis tecnics che a son ogni an inte tempistiche dai finanziaments. I bêçs pes lezions di furlan, sedi che a vegnin fatis di personâl dentri de scuele o di esperts che a vegnin di fûr, a rivin masse tart intal cors dal an e a condizionin la procedure regolâr par inviâ lis ativitâts didatichis. Plui tart si scomence, plui timp si piert. E stant che lis oris di insegnament a varessin di jessi (inte scuele primarie) une ae setemane par 30 setemanis, in tancj câs il numar des oris al ven scurtât, e no di pôc.
Une planificazion pronte des ativitâts e covente ancje parcè che nol è simpri facil rivâ adore a cjatâ il personâl che al à titul par insegnâ il furlan. E no simpri si cjate int avonde preparade. L’elenc regjonâl di chei che a son autorizâts a jessi clamâts insegnants di furlan al met adun plui di 1600 personis, ma trops di chescj àno une vere formazion? Intun an di ativitât, “Docuscuele” – il Centri di documentazion pal insegnament dal furlan a scuele –, al à incrosât cu la sô ativitât 1002 mestris e professôrs. E chei altris, dulà sono? Sono za masse brâfs o si sono iscrits tal elenc cence vê avonde esperience?
Ma ancje dulà che al è il personâl, i problemis a vegnin de stesse componente dai insegnants: a son in tancj chei che a scuele a lavorin no a pro, ma cuintri de marilenghe. A consein i gjenitôrs di no sielzi il furlan, a lavorin par no inserî cheste ativitât intai plans de ufierte formative, e se no rivin propit a scancelâ la marilenghe dal insegnament, no puedin fâ di mancul di segnalâ – cuant che ae fin dal an a mancjin oris par finî il program curicolâr – che lis busis di orari a van jempladis gjavant oris propit al furlan.
Chescj câs a son tancj, e a laressin ducj segnalâts di bande des fameis. Ma a cui? L’Ufici scolastic regjonâl nol à mai mostrât di volê frontâ il probleme monitorant cun atenzion la situazion, e cussì si riscje di lassâ la aplicazion de leç (e soredut l’implei dai bêçs publics che a son destinâts a cheste fate) al câs. Cul piçul agravi che i finanziaments de Regjon tai istitûts a rivin, e se il furlan nol ven insegnât i gjenitôrs e i fantats a àn dut il dirit di sintîsi imbroiâts. Al coventarès invezit che ducj, a partî dai dirigjents scolastics, par continuâ cui mestris e cu lis stessis fameis, a fossin plui responsabii: de lôr maniere di frontâ la cuistion al dipendarà doman l’avignî de nestre lenghe, ma za vuê e dipent la serietât di un sisteme e di une organizazion, come chei de nestre scuele, che a varessin di jessi un model crodibil e afidabil. ❚
Walter Tomada