Mancjance di dirigjents, al è daûr a rivâ il concors

E par vê la competence primarie su la istruzion, «al sarès strani che il Friûl nol lavoràs cun Venit e Lombardie»
«O savevin che nol sarès stât facil, ma forsit lis robis a son ancjemò piês di chel che o pensavin»: lis peraulis de assessore Rosolen no lassin nissun dubi sul stât de scuele furlane e triestine. Ma cemût si fasial alore a salvâ l’avignî dal nestri sisteme di istruzion? La strade e je di rive sù, ma la Rosolen e à un aleât di chei di prin plan: al è furlan, di fat, il president de Comission Istruzion dal Senât Mario Pittoni, che L’Espresso al à atacât parcè che al mancje di curriculum, ma che tancj intal mont de scuele a varessin volût Ministri. Za de legjislature scomençade tal 2008 e finide tal 2013 al è stât di fat il plui atent esponent de Leghe a ocupâsi dai temis de scuele e de universitât. Ma la potence de Lombardie e à puartât ae cjadree di Ministri Marco Bussetti.
Dut câs, al è propit a Pittoni che la Rosolen e à za domandât une man par risolvi «i problemis che nus vegnin di agnorums di sieltis sbaliadis». Cul cûr in man: «La determinazion no nus mancje, ma e je Rome che e à di dânus un segnâl normatîf fuart». E il senatôr furlan no si tire indaûr.
«O vin za scomençât – al dîs – a cjapâ in man lis cuistions che a tocjin i dams fats de “Buona Scuola” dal guvier Renzi, ma al covente timp par comedâ la situazion». Ma pal Friûl-Vignesie Julie? «Stant che il probleme principâl al è chel de mancjance di dirigjents, bisugne cori cul concors. E o sin za lâts indevant par scurtâ i timps gjavant ducj i passaçs burocratics che a levin a slungjâ la tempistiche».
E pe autonomie dal Ufici scolastic regjonâl? «Ancje chi al è un declassament di comedâ. Un dai efiets de spending review al è stât chel di gjavâ i dirigjents di prin nivel dai Uficis scolastics sot di un ciert numar di abitants. O vin za domandât che il Ministeri al concedi al Friûl-Vignesie Julie un dirigjent di prin nivel al puest di doi di seconde fasse. In alternative, o domandarìn une clausule di tutele pe Regjon che, jessint a statût speciâl, e va considerade in maniere diferente di chês altris».
Rivaraial mai il Friûl-Vignesie Julie a vê la competence primarie su la istruzion? «Le varès za vude se il guvier Monti nol ves fermât il federalisim fiscâl. Jenfri dai 8 decrets al jere ancje chel che nus passave la materie». E cumò? «Il sucès dal referendum in Venit e Lombardie al vierç une gnove tape intal rapuart jenfri il Stât e lis Regjons. Lu à capît ancje la Emilie-Romagne che e sburte ancje jê par vê competencis gnovis. Al sarès strani che il Friûl nol lavoràs cun lôr par slargjâ ancje lis sôs competencis». ❚
Walter Tomada