SPECIÂL – Di indulà vegnial il nestri «mâl dal modon»?

In Friûl, l’intensitât dai leams cui lûcs e je palesade ancje dal indiç di proprietât des abitazions, une vore alt (86%). Ma ce sburtial i furlans a investî tantis energjiis te cjase? Tal so articul sientific «Il mal del mattone. La casa nell’ethos friulano», il sociolic Raimont di Strassolt al met in lûs diviers aspiets dal popul furlan che a podaressin spiegâ almancul in part il nestri «mâl dal modon».
A zuiaressin in primis determinants gjeografichis e ambientâls tant che la grande plovositât e la sismicitât. Tal prin câs, al è evident che al sarà un ûs plui intens e sprolungjât de cjase, tal secont si scrupule che si crei tal pinsîr comun une fuarte valorizazion par un ben periodichementri distrut e di tornâ a fâ sù.
La cjase po, e sarès la materializazion des dibisugnis di inlidrisament dai furlans, che daûr dai stereotips etnics a son caraterizâts de concretece, de soliditât, de prudence, e de mancjance di slanç e di fantasie.
Culì a saressin di fat plui fuarts che di altris bandis i bisugns di sigurece, par vie de memorie coletive des miseriis de condizion rurâl tradizionâl e dai events catastrofics naturâi e belics, che a àn trasformât il Friûl te puarte di jentrade di dutis lis invasions di Soreli Jevât.
In fin, massime la emigrazion temporanie e stagjonâl e à alimentât un tacâsi fuart ae cjase, li che si sa che prin o dopo si tornarà. Cun di plui, la emigrazion e jere spes viers paîs transalpins (lis Gjermaniis), dulà che e je une vore disvilupade la culture de cjase. Se po si ten cont che la plui part dai emigrants e lavorave te edilizie, si pues capî inmò plui cemût che chest contat al vedi permetût ai nestris di assorbî tecnichis, formis e modei dal abitâ.
Riferiments:
– R. Strassoldo,1987, Il mal del mattone. La casa nell’ethos friulano, in «Sociologia e ricerca sociale», 8, 22, pp. 59-74.
– S. Di Luca: «La casa a nord est» (www.bassafriulana.org)
Linda Picco