Anno Domini 1409. Cividât. Fûr de congregazion dai cardinâi e dai lôr segretaris, la citât si colore cu la sô vite: i cjaradôrs sul puint dal Nadison a fasin lâ indenant i nemâi a colps di vuiscje e di blesteme; la place dal marcjât si fâs vivarose cui bancuts plens di verdure, lis scjaipulis cui poleçs e cu lis cuaiis, lis pelicis di bolp e di bilite picjadis a suiâ sui stecs, prontis par jessi vendudis a cualchi peliçâr di Udin. Vôs e berlis in lenghe furlane e sclave, cualchi acent par todesc. Un marcjadant di Vignesie, cul pes di Maran tal zei, che al pretint di jessi paiât in monede e no in cambi di un zeut plen di ûfs. Un frari dominican, devant de puarte dal Domo, cun vôs çondare e alçant in alt la sô crôs di len, al ricuarde che il timp de fin dal mont si svicine, che al bisugne preâ il Signôr che al sparagni cheste umanitât di pecjadôrs, pioris cence pastôr pierdudis intun bosc là che la bocje dal lôf lis spiete. E sot di une verande, intal borc dai Ebreus, cualchidun, piçant lis cuardis di un liût, al cjante “Piruç myo doç inculurit”, indreçant i voi ae morute che e cuche dal barcon.
Dentri dal palaç dal Patriarcje la situazion si fâs grivie. Cualchidun al sunsure inte orele dal so vicin che al môf la bocje a smorfie, al nice il cjâf, al alce lis mans adalt, come par clamâ su la assemblee il jutori di cualchi potence dal cîl. In zenoglon, devant di ducj, in at di profonde umiltât, Gregori XII, il pape a pene nomenât cuintri i siei aversaris, al ricêf l’omaç dal Concili. Al secul si clame Agnul Correr, un venezian, ma libar di pinsîr. Al è il tierç pape. Chei altris doi a resistin, ognidun vuidant la sô fazion, movint esercits, armâts, benedint copariis e maçalizis: citâts brusadis, cjistiei sdrumâts, int copade. Almancul Correr al crôt che e sedi la culture a podê jessi doprade come medisine juste cuintri il mâl de Glesie universâl. Par chest, al sielç Cividât, sede di un Patriarcjât che al svante ancjemò une tradizion antighe, siore di lenghis e di bielece, poiade intal cûr di une Europe plurâl, che e podarès ufrî la rispueste juste a tant mâl. Cussì al pense il bon pastôr, o come che lu clamin aromai ducj i cardinâi riunîts in cheste curie dute furlane il “Pastor Angelicus”. Siums che a savoltin la pâs de sô anime, cuant che il dean dai cardinâi i met sul cjâf la sacre tiare.
La sere prime, suntune grande taulade imbastide su la place grande, i vevin fat cerçâ un dolç speciâl, inventât dai cogos plui bulos: inte lenghe sclave lu clamavin “gubane”, ma i spiegarin che al rapresentave il misteriôs grop di Salomon, chel che al varès viodût di li a cualchi dì inte antighe Basiliche Mari in Aquilee. Une strece, un incuintri, une intersezion che e varès vût di contâ il sens dal infinît. Al riduce, il vecjo pastôr, pensant a cetant buine che e pues jessi la pâs. E se par dî messe i fasin santificâ l’altâr cun chel vin sant che al à compagnade la gubane – chel “Rosacense Vinum”, i diserin, gjavât fûr dal len des vîts de Badie di Rosacis, pensât par regalâ la gjonde ancje ai agnui -, ben sigûr la storie e varès dade reson ae lôr fazion. Cussì si insumiave Agnul il Venezian. Mentri che fûr des muracis di chê sacre congregazion e svolave ad alt la Bestie cu lis sôs sgrifis crudêls, e trê gosis plenis di fam, trê bocjatis di drâc là che si masanavin i potents dal mont: papis e imperadôrs, cardinâi e grancj siôrs, sants, juscj e pecjadôrs… come che e cjantave la laude, propit chê intonade de fradaie dai Batûts, in procession, la sere prime. Une profezie? O dome un sium? E intant che nissun al someave che si rindès cont di ce che al stave par sucedi, vierte la puarte dal infier, un frutut, lassat di bessôl, al cjalave cun voi maraveâts tal scûr, come se alc al viodès. Dome lui! «Antoni, viôt che tô mari ti sta cirint. Torne li di jê, prime che e stedi in pinsîr par te!».
di Agnul Floramo
