Casapound Italia
«Prime di dut fermâ la invasion dai imigrâts»
Luca Minestrelli, 32 agns, dipendent des Feroviis statâls, di origjin cjargnele, al è il responsabil provinciâl di Casapound. Al è candidât par Casapound Italia.
1. «Fevelâ cumò di capitâl dal Friûl cuant che o sin in presince di une invasion di imigrâts mi pâr che no sedi il timp. Prin di dut, o vin di impedî cheste invasion. Dit chest, nô o sin convints che Udin al è il cûr di cheste provincie e o vin la massime considerazion de lenghe, dal teatri furlan, ma ancje dai prodots tipics de nestre tiere e dal turisim che si pues svilupâ in gracie dal sflandôr dal nestri teritori».
2. «O crodìn cussì tant intun rapuart rinovât di Udin cul sô teritori dal dulintor che tra i ponts dal nestri program al è chel di meti sù un bus navete che al consinti facii colegaments. Un servizi che o crodìn che al podarès judâ ancje a rilançâ il centri storic, metût in crisi ancje de politiche de Zonte di Furio Honsell».
3. «Udin e je stade dismenteade, cussì come la Cjargne, che a àn di jessi di gnûf riconsideradis. Un dai aspiets che a àn di jessi potenziâts al è chel dal turisim, par vie che o vin cetantis risorsis agroalimentârs che a àn di jessi ben valorizadis come la citât di Udin».
4. «La lenghe e la culture furlanis a àn di jessi tramandadis di pari in fi. Dut câs, tal nestri program nô o pensìn a spazis di pueste ator pe citât dulà valorizâ la lenghe e ancje pandi ce che di artistic si prodûs in cont de culture furlane. Il prin probleme, cumò, però, al è di fermâ la invasion, se no al è pôc ce fevelâ di lenghe e di culture furlanis».
5. «Al prin puest e je la sigurece: aumentâ la presince de polizie inte stazion dai trens e in altris bandis delicadis de citât; fâ une ordenance dal sindic par mandâ vie ducj i iregolârs che a fasin dams; no permeti di stâ tai zardis publics. Po tocje invistî par meti in ordin lis stradis e bisugne rilançâ il centri storic. In chest câs, o pensìn ae cedolâr al 15% ancje pai fits comerciâi».
di Antonella Lanfrit