Sfuei Mensîl Furlan Indipendent
Archivi de Patrie

ELEZIONS REGJONÂLS DAI 29 DI AVRÎL. Fraleoni Morgera: «Tutele des minorancis? No covente scuele e tv, ma plui poie aes sagris»

............

Fraleoni Morgera
Alessandro Fraleoni Morgera

E al anunzie un grant plan pe inovazion des impresis e pe assistence ai anzians

Lis minorancis linguistichis? “A son za avonde tuteladis e a van valorizadis no a scuele o sui mass media ma intal setôr turistic”. Coventie une rapresentance istituzionâl pal Friûl? “Vonde poltronificis”. Cussì le pense Alessandro Fraleoni Morgera, candidât ae presidence de Regjon pal Movimento 5 Stelle.  Roman di nassite e bolognês di adozion, 48 agns, al è ricercjadôr tal dipartiment di Inzegnarie de Universitât di Triest, citât dulà che si è trasferît par amôr 10 agns indaûr maridant une triestine, e di chê union a son nassudis dôs fiis.

1) Une des primis robis che o vuei fâ al è vierzi un confront cul Ministeri de economie par capî ce margjins che a son par recuperâ almancul une part di chestis sumis, stimadis ator dal miliart. E sarès une bocjade di ossigjen pes cassis de nestre regjon.

2) Par ce che al tocje il metodi, o stimìn che nol ledi gran ben sfuarçâ i comuns a fâ part des Uti e, piês ancjemò, obleâju a destinâ ciertis funzions aes Uti. In regjon a esistin altris tipologjiis di consorzis volontaris che a fasin za une vore ben lis funzions che la riforme Serracchiani-Panontin e à destinât aes Uti. Par ce che al tocje i contignûts de riforme, a son tantis carencis procedurâls. Par esempli, il patrimoni de edilizie scolastiche des Provinciis al è stât assegnât ai comuns, no cussì il personâl che al è stât trasferît aes Regjons, come pûr lis risorsis economichis relativis.

3) Par nô il Friûl-Vignesie Julie al è une regjon uniche, ancje se intes sôs diversitâts culturâls, linguistichis e paisagjistichis. Al è un sôl teritori che al à di fâ de proprie diversitât une font di ricjece e di disvilup sociâl e economic. No volìn plui sintî fevelâ di rapresentance teritoriâl in tiermins di poltronis, ma cul Movimento 5 Stelle al guvier de regjon lis comunitâts linguistichis a vuadagnaressin une rapresentance vere dentri des istituzions in tiermins di oportunitât pai citadins. L’asset di cumò de tutele des minorancis linguistichis, cui spazis za previodûts intes scuelis e intal palinsest di Radio Rai, al somee sodisfasint. Si puedin pensâ, dentri di un plan strategjic culturâl, altris pussibilitât di valorizazion di sagris, fieris, manifestazions publichis, inserint lis particolaritâts linguistichis, lis tradizions, la enogastronomie intai circuits turistics de regjon, parcè che la culture e je un element fondamentâl dal turisim moderni.

4) Il nestri tiessût di manifaturis al è fat soredut di impresis piçulis e mediis che a fasin fature a frontâ la concorence intal mont globalizât. In chest contest no si pues plui competi sul cost dal lavôr e su la modernitât dai machinaris, ma si àn di inietâ dosis gruessis di inovazion, soredut intes impresis piçulis e mediis. O vin la fortune di jessi une regjon cun tancj centris di ricercje, cun ecelents ricercjadôrs a nivel internazionâl. A esistin za in regjon diviers centris di trasferiment tecnologjic che a laran potenziâts e rindûts plui eficients, impuartant lis miôr pratichis mondiâls di trasferiment tecnologjic par inovâ i prodots e i procès produtîfs.

5) La riforme sanitarie di Serracchiani e Telesca e à ridusût lis risorsis ai ospedâi, e à mandât in piês la organizazion interne des aziendis sanitariis, produsint riflès negatîfs su dut il sisteme dal benstâ sociâl. Par rilançâ la natalitât o vin prin di dut bisugne di deprecarizâ il lavôr e di incentivâ la creazion di asîi publics e aziendâi. A van judadis ancje lis fameis mancul abenadis che a àn un anzian cun gruessis necessitâts assistenziâls e malatiis cronichis. La Regjon a 5 Stelis e darà grant supuart ai anzians in mût di slizerî il pês des malatiis cronichis e de assistence continuade che e cjame su lis fameis.

di Roberto Pensa

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +