Dopo des elezions al è avonde tipic che ducj i partîts politics a disin di vê vinçût. Chest fenomen curiôs al è sucedût ancje dopo des elezions catalanis dai 21 di Dicembar.
A disin di vê vinçût i partîts indipendentiscj, che rivant al 47,5% dai vôts, a puedin vê la maiorance dai elets tal Parlament regjonâl.
A disin di vê vinçût i spagnoliscj: C’S, partît demagogjic e arogant, che al è deventât chel plui votât, cun passe il 25%; i socialiscj, che a son cressûts di un 1% bondant (scuasi il 14%); fintremai il Partît Popolâr, responsabil de repression violente dal referendum, ancje se si è smiezât di vôts (cumò al à pôc plui dal 4%), al pues dî che almancul i siei nemîs indipendentiscj a àn pierdût (un 0,3%…).
Ma la realtât e je contrarie: ducj a àn pierdût.
I indipendentiscj no rivin a vê plui dal 50% dai vôts, nancje dopo de indignazion pe violence spagnole: la societât catalane e à plui pôre che sperance te indipendence e un progjet, in efiets mai imbastît, di Republiche Catalane nol è rivât a convinci la plui part dai catalans; la int è à miôr un mâl sigûr, la Spagne franchiste, che no une Catalogne che nissun sa.
I spagnoliscj a volevin par fuarce cjapâ il guvier de regjon (un guvier che a sarès stât catastrofic no dome pe indipendence, ma fin pe esistence de Catalogne), e invezit si son dome robâts i vôts un cun chel altri (in particolâr C’S al à supât il sanc al PP), restant su lis posizions di prime.
Salacor la robe miôr e sarès che ducj a ricognossessin di vê pierdût e che chei interessâts al ben de Catalogne a tornassin a fevelâ di alc che al pues dâ dongje il consens e la partecipazion di une maiorance pardabon largje de popolazion: la autonomie, une autonomie fuarte e sostanziâl, cuntune dotazion economiche come chê dal Paîs Basc.
Dut câs al è dificil che, par interès e par caratar, i politics che si frontin in Catalogne e in Spagne a rivin a un tant.
Si pues previodi une lungje campagne di sfiniment: i indipendentiscj a ciraran di meti in crisi la Spagne evidenziant dutis lis sôs contradizions antidemocratichis e la sô coruzion (grande che mai e cun tancj procès impins…); i spagnoliscj a cjataran dutis lis manieris di inderedâ il guvier catalan. Nissun nol vinçarà, ma al sperarà che chel altri al coli prime…
di Sandri Carrozzo
