Popolo della Famiglia
«Combati la denatalitât al rindarà fertile ancje la economie e la societât»
Lanfranco Lincetto, 56 agns, architet libar professionist, dal 2016 al è l’unic elet dal Popolo della Famiglia, la formazion politiche ispirade dal gjornalist Mario Adinolfi e dal so cuotidian “La croce”. Lincetto al è di fat vicesindic di Cordenons intune coalizion di Centridiestre. Si presente intal uninominâl pal Senât intal coleç di Udin-Pordenon e tant che prin de liste intal listin proporzionâl.
1. O sin une regjon a statût speciâl dome su la cjarte, parcè che no rivìn a gjestî lis nestris risorsis ad implen. Invezit e sarès tant impuartante une plui grande autonomie finanziarie devant de agressivitât fiscâl dai nestris vicins austriacs e slovens.
2. La tutele des tradizions e partìs de difese de lenghe mari. A Cordenons o fevelìn un dialet furlan, clamât “folpo”, realtât che e va tutelade parcè che risultive di chê dignitât des personis che e da dopo la fuarce interiôr di frontâ ducj i grancj problemis de nestre societât.
3. A nivel nazionâl o proponìn une revision dal Jobs act, ridusint i câs di licenziabilitât e lis formis di precarizazion dal lavôr. A nivel locâl, o pensìn che il Friûl-Vignesie Julie nol à di restâ une aree di passaç, ma che al vedi di intercetâ i flus di personis e di marcjanziis che a puedin creâ oportunitâts economichis. Par chest, e coventarès fate une revision urbanistiche complessive de Regjon e des sôs rêts di traspuart, in mût che nol esisti dome che il puart di Triest ma dute une serie di infrastruturis che a puartin i vantaçs dai trafics sul teritori.
4. Tra lis nestris propuestis al è il redit di maternitât (mil euros al mês pes feminis che si dedichin in maniere esclusive ae maternitât), une riforme fiscâl che e aplichi il cuozient familiâr e che e dedi la pussibilitât di detrai dal redit i coscj pai fîs. In Italie, pal bas numar di chei che a nassin, al è come che e sparìs une citât di 500 mil abitants ogni an. Se o zontìn la fuide di zovins cerviei e il rivâ di lavoranzie imigrade no cualificade, al ven fûr il cuadri di une implosion su se stesse de nestre societât.
5. A mancjin procediments di urbanistiche condividude cu la popolazion, e chest al è un grant probleme. Al va invertît il trend dal consum dal teritori, recuperant lis areis industriâls abandonadis dopo de crisi, par rilançâ agroalimentâr e turisim sostignibil.
