Benvignûts tal grant marcjât des promessis eletorâls! E je scomençade la competizion politiche pal rinovament de Cjamare e dal Senât (si vote ai 4 di Març) e, confermant une tindince in at di almancul un venteni, si anunziin programs simpri plui pompôs ma ancje di realizazion improbabile, massime sui temis nazionâi (fisc, famee, lavôr e imigrazion) a dut disavantaç dal realisim, de concretece e des implicazions locâls des sieltis nazionâls, che su chescj aspiets al è plui dificil esercitâ la fantasie eletorâl.
“La Patrie dal Friûl” cun chest servizi articolât e cîr di ripuartâ il dibatiment “su la tiere” e, al è clâr, su la tiere furlane. O vin fat ai candidâts domandis (lis cjatais intal ricuadri sot) sui temis centrâi de prossime legjislature pal Friûl: la autonomie finanziarie di Rome, la tutele e la valorizazion de lenghe e de culture furlane (e cun cheste, cun dignitât compagne, di chê slovene e todescje), il rilanç de economie, il probleme de denatalitât e dal invecjament dai furlans, lis emergjencis ambientâls dal nestri teritori.
Viodût il grant numar di listis e di candidâts in corse, si è fate la sielte di selezionâ dome lis propuestis politichis che a mostrin une presince e ramificazion reâl sul teritori furlan. Cussì, in bande des grandis coalizions e dai partîts nazionâi, o vin dât atenzion al Pat pe Autonomie ispirât di Sergio Cecotti (che cun chel a son confluîts ancje i Manoâi pe autonomie e Patrie Furlane) e al Popolo della Famiglia, moviment nazionâl, ma presint in maniere significative in Friûl. Al someave che al podès jessi de partide ancje il moviment autonomist “Acuile Furlane”, che in efiets al à presentadis lis firmis, ma che al è stât escludût de Cort di Apel di Triest par un vizi procedurâl. Al è dut câs un fat di puartade storiche il tornâ des fuarcis autonomistis intes competizions eletorâls nazionâls. Al è il precedent storic dal Moviment Friûl (presint aes Politichis ben trê voltis, intal 1979, 1983 e 1987), ma al bisugne calcolâ che, chê volte, si cjatavisi ancjemò intal clime politic de vuere frede, cuntun ecuilibri de pôre che al limitave tant l’atrat eletorâl des fuarcis autonomistis. Al sucêt invezit pe prime volte inte seconde republiche, intun clime culturâl di grande delusion pal operât dai partîts nazionâi e caraterizât di un gnûf sflorî european dai autonomisims, de Scozie ae Catalogne, cence dismenteâ l’ultin câs de Corsiche.
E a un prin risultât i autonomiscj a son za rivâts: come par incjant, i programs dai grancj partîts si son dâts une man di autonomisim. Ancje chei che, vint guviernât intai ultins agns, a ciertis cuistions a àn dedicât ben pocje atenzion.
Ma ve il cuadri dai partîts in corse (22 pe Cjamare e 20 pal Senât): a centriçampe il Pd al cor cun “Europa insieme” di Emma Bonino e dal ex socialist Nencini e cu la liste “Civica popolare” de ex ministre de Sanitât Beatrice Lorenzin. Il centridiestre al cjamine su cuatri “gjambis”: Forza Italia, Lega Nord, Fratelli d’Italia e i centriscj di “Noi con l’Italia”. Corse “solitarie” par Movimento 5 Stelle, Liberi e Uguali, Pat pe Autonomie, Popolo della Famiglia, Casa Pound, Per una sinistra rivoluzionaria, Potere al popolo, Italia agli italiani, Partito valore umano, Blocco nazionale delle libertà, 10 volte meglio, Lista del Popolo per la costituzione, Mir (il moviment di Sgarbi) e Siamo.
Viodìn cualchi curiositât dai scuintris al uninominâl. Pal Senât a Triest-Gurize al torne in cjamp l’ex president Riccardo Illy pal centriçampe. Intal coleç di Udin-Pordenon, Luca Ciriani (Centridiestre) se viodarà cu la europarlamentâr Isabella De Monte pal Centriçampe e cul scritôr Tullio Avoledo pal Pat pe autonomie. Ae Cjamare, intal coleç di Triest si dan cuintri doi furlans “une vore particolârs”: la presidente de Regjon in jessude Debora Serracchiani e rapresentarà il Centriçampe cuintri il cjargnel Renzo Tondo. In pratiche, la riedizion de sfide des Regjonâls dal 2013.
di Roberto Pensa (e à colaborât Erika Adami)
______________________________________________
Lis domandis ai candidâts
1. I pats Tondo-Tremonti e Serracchiani-Padoan a àn indebilide une vore, dal pont di viste finanziari, la autonomie speciâl dal Friûl-Vignesie Julie. Cemût ju valutial/valutie e cualis iniziativis puartaraial/puartaraie indenant in merit?
2. La tutele e la valorizazion de lenghe furlane e patìs, massime in merit ai doi cjapitui fondamentâi dal insegnament intes scuelis e dal ûs intai mass media, ancje intal servizi public Rai. Ce vuelial/vuelie fâ su chel cont?
3. I trafics tal puart di Triest a svolin e la ativazion de zone francje a dan al cjâf lûc regjonâl la oportunitât di atrai gnûfs invistiments. Lis ricjadudis sul Friûl dal inviament dal coridôr feroviari Adriatic-Baltic a son minimis. Lui/Jê si bataraial/bataraie par che il Stât al invistissi ancje sul disvilup logjistic des zonis industriâls furlanis che a son dilunc dal coridôr?
4. I furlans a riscjin la estinzion, strents tra denatalitât, alte emigrazion zovine cualificade e imigrazion no cualificade. Cuâi rimiedis struturâi proponial/proponie?
5. De tierce corsie de A4 ae alte capacitât feroviarie, dai eletrodots al consum cetant grant di teren fin aes zonis di bonificâ e al ipersfrutament dai cors di aghe pal idroeletric, l’ambient furlan al è sot assedi. Cualis sono lis sôs prioritâts sul teme?
