So pari e mê mari a jerin fradis intune famee di 12 fîs. Lui dal ’40 e jo dal ’49 o vin vût, come tancj, il destin di jessi clamâts come i nonos: Josef e Antoni. E, stant che si nas piçui, o sin deventâts Bepino e Tonino.
Tai miei ricuarts al è simpri stât seminarist. Di fat, al è jentrât in seminari che o jeri in asîl e al è deventât predi che o jeri fantacin. Lu viodevi pal plui cualchi sabide e domenie, che al vignive in paîs a dâ une man al plevan, e, po dopo, vie pes vacancis.
Dongje di jessi so cusin o jeri ancje zagut e mal visi simpri in ativitât passionade, vûstu par animâ la liturgjie, vûstu par tignî ben lis robis de glesie. Nol jere parament, cjandelîr, standart che al fos lassât malsestât. E alore tu lu cjatavis in sagristie in zenoglon a sfreâ cuntune mieze cevole la tele dai standarts, o ben, a russâ cun cinise e asêt i cjandelîrs arzentâts. Al jere inmagât di musiche, cjant, art e bielece.
Inamorât de nestre glesie di Sant Stiefin tal cimitieri, a Remanzâs, tu lu viodevis sentât sul muret cun cjarte e lapis a dissegnâ sot di ogni forme chel biel monument.
O vevin une agne che e jere lade a marît a Vignesie e che nus tignive a cjase sô ogni tant par cualchi zornade. Mi ven ancjemò mâl di gjambis a pensâ a tropis corsis par puints, cjampiei e fondamentis par lâ a viodi magari dome un cuadri di Tintoretto intune glesie “periferiche”, che, “par lâ a Sant Marc o tal Palaç Ducâl, tu puedis lâ di bessôl, vuidât di un libri”. Mi visi di une volte che mi à menât te abazie di Sant Zorç, là che al à clamât un benedetin, che insiemi si àn metût a fevelâ di musiche cuntune passion mai viodude. Plui indevant o ai savût che chel benedetin al jere Pelegrin Ernetti, grant studiôs di musiche antighe, che Bepino al veve frecuentât cun lui cualchi cors e che insiemi a jerin deventâts forsit i plui grancj studiôs dal cjant patriarcjin. Cence di lui, mi varessie vignude la passion pe storie e pe art che mi cjati intorsi? No isal avonde par vêi agrât?
di Antoni Buiani
