TERITORI – SLOVENIE. In Slovenie interès scjars pes elezions europeanis

Si podarès clamâle «cuote 28». Vincjevot, come la percentuâl dai eletôrs slovens che a son lâts a votâ in ocasion des ultimis Europeanis dai 7 di Jugn (e no dai 6 e 7 come ca di noaltris). Vincjevot e je ancje stade la percentuâl di cinc agns indaûr, cuant che in Slovenie, jentrade a plen titul te Ue a pene un mês prime, si le a votâ pe prime volte pal parlament di Strasburc. E juste apont ancje in chê ocasion dome il 28 par cent, in pratiche un citadin su cuatri, al le a votâ pandint cussì scjarse fiducie tes struturis de grande famee europeane che e veve a pene dât bon acet ae piçule Slovenie. Cinc agns indaûr il mont politic sloven al disè, ancje par sigurâ se stes ma massime i sorestants di Bruxelles, che aes elezions dal 2009 cetant plui Slovens a saressin lâts a votâ, dopo vê vivût ad in plen te suaze de Europe unide e – ma in chê volte ancjemò no si saveve la date juste – dopo vê vût pes mans la monede uniche, l’euro. Dut câs, la realtât e je stade une vore divierse: magari cussì no la Slovenie al è stât il sest paîs jenfri i 27 membris de Ue cun mancul votants, li che i membris di Soreli Jevât a son stâts chei che a àn pandût mancul interès viers lis istituzions dal Continent Vieri. La medie de Union e je stade alçade di paîs come Belgjiche, Lussemburc, Malte e Italie, tocjant il 43 par cent.
Cemût mai i Slovens, che a vevin poiât cun entusiasim la jentrade di Lubiane te Ue in ocasion dal referendum dal Març dal 2003, sono cussì clips viers lis elezions europeanis? Un dai motîfs che ai 7 di Jugn stâts a àn puartât dome 481 mil di lôr a votâ su un totâl di un milion sietcent mil eletôrs, al è la scjarse rapresentance dal paîs a Strasburc. Lant daûr de popolazion di ogni stât membri, su 785 eurodeputâts dome siet (mancul dal un par cent) a son li di pueste par difindi i interès slovens. Clâr che la int si domande la impuartance in tiermins reâi di chest piçul trop di deputâts, e anzit prime dal vôt a son vignudis fûr polemichis rivuart ai lôr stipendis. Secont i gnûfs regolaments de assemblee di Strasburc, ogni membri dal parlament european al metarà te sachete 7.785 euros al sporc ogni mês, mintri che prime des elezions i europarlamentârs slovens a cjapavin ogni mês 4.400 euros simpri al sporc, mancul dai deputâts de Cjamare di Stât di Lubiane e cuasi trê voltis di mancul rispiet ai lôr eurocoleghis talians, stant che lis pais a rivin dal belanç dal Paîs di apartignince. Il stipendi dai siet deputâts slovens al è plui alt ancje di chel dal prin ministri Borut Pahor, che si ferme a 6200 euros a sporc, 3200 nets.
Ancje par vie de basse afluence, lis elezions europeanis no àn vût cetante impuartance te suaze de politiche interne slovene. La maiorance relative e je lade ae plui impuartante formazion de oposizion, il Partît democratic di centri drete dal ex cjâf dal guvier Janez Janša cul 26,7 par cent. Sconfite pe formazion dal premier Pahor, i Sociâl democratics, cul 18,5 par cent, mintri che cul 16,5 par cent il vêr vincidôr al è stât Alojz Peterle, leader di Nova Slovenija (Gnove Slovenie), partît di centri. Prin cjâf dal guvier de Slovenie indipendente jenfri il 1990 e il ‘92, dal ‘93 al ‘94 e tal 2000 ministri pai Afârs forescj, Peterle al jentrà tal parlament european tal 2004 e duncje al è stât confermât a Strasburc, l’unic jenfri i gnûf siet rapresentants slovens.
Si che duncje, al Parlament european la Slovenie e varà doi deputâts democratics, doi sociâl democratics, un di Gnove Slovenie, un democratic liberâl e un di Zares, partît di çampe. Si pues dî che la maiorance cumò al guvier e vedi vinçût, stant che cuatri eurodeputâts a son dal centri çampe e trê dal centri drete; dut câs la paritât e podarès rivâ in curt par vie che, dopo de jentrade in vore dal tratât di Lisbone che al proviôt une riforme des istituzions comunitariis, la Slovenie e varà vot deputâts, e chel puest in plui al larà a un democratic.
ALESSIO POTOCCO