- Lâc di Sauris, dighe Gola dal Lumiei
Ce covential vê la Regjon taliane plui siore di centralinis idroeletrichis, se i vuadagns de energjie produsude a van ducj a jemplâ lis sachetis di societâts fûr dal Friûl? Sal domandin in tancj, ma nissun nol rive ancjemò a capî cemût che al è stât pussibil che intai agns un patrimoni di grande valence tant che chel nassût di Arturo Malignani e puartât indevant (cun incidents di percors tragjics come chel dal Vajont) di ents publics e societâts privadis, in dì di vuê al sedi pe nestre Regjon nuie altri che une partide a pierdi.
A son purpûr esemplis ator che a funzionin: il Trentin e il Sudtirôl a àn la lôr societât publiche di gjestion de energjie e a tegnin dûr a no molâ la custodie e la gjestion des lôr aghis e des lôr dighis. Lis centralinis a dan cussì benefici ae popolazion che e paie di mancul. Parcè chenti no si isal mai volût fâ un resonament di cheste fate? Si disarà che no son bêçs. Ma la esperience de Secab, che e va indevant di un secul inte val de Bût, e mostre che se si à la cussience di tignî cont des risorsis che il nestri teritori nus regale si pues rivâ ancje a vê un vuadagn economic no di pôc.
Invezit la situazion cuale ise? Inte nestre regjon a son 203 implants idroeletrics. Su 500 milions di Kilowatt che la Cjargne e prodûs cun centralinis idroeletrichis, 400 a van a pro di Edison e Edipower, societâts che a fasin riferiment a A2A, la partecipade dai Comuns di Milan e di Brescia. Edison e je ancje in part controlade di EDF, Energie de France, cussì ancje i francês a gjoldin dai profits de nestre aghe.
Ma se lis dighis di Barcis, Ravedis, Sauris, Crosis, a fasin part dal paisaç, nol è cussì pes tantis realtâts dulà che l’idroeletric al sta rivant pal interès di pôcs e la int no lu vûl. A son deventâts câs di croniche i moviments de int cuintri de autorizazion a costruî centralinis su la Fuine e sul Alberon: de Val Pesarine al Comun di Savogne il concet al è simpri chel, l’idroeletric al ven pensât par fâ bêçs a pro di privâts parcè che la Regjon fin cumò no à mai pensât aes oportunitâts che al crearès. Puescj di lavôr, mancul coscj pai citadins e pes impresis, energjie nete: sino sigûrs di lassâ dut in man a cui che al viôt la nestre tiere dome tant che un teren di concuiste?
Bastarès lâ daûr di une propueste di leç che e jere stade depositade timp indaûr dal conseîr regjonâl Roberto Revelant, stiçât dal simpri svelt Franceschino Barazzutti, che e domandave di costituî une societât eletriche regjonâl par lâ a rivendicâ lis concessions che a scjadaran tai agns che a vegnin. Si proponeve di aumentâ la cuote che i concessionaris a àn di paiâ aes comunitâts tant che rifusion dai dams ae nature de mont, ma Elettricità Futura, il consorzi des societâts di gjestion eletriche di Confindustria, e à fat savê ai conseîrs regjonâi che no si impensin di modificâ la situazion atuâl parcè che ogni cambiament de leç al larès cuintri de libare concorence.
Ma parcè i furlans no varessino di jevâsi a reclamâ ce che al è lôr? Parcè contentâsi di fâ vuadagnâ chei altris cu la nestre aghe, cuant che e je nestre? Parcè – come che al diseve pre Checo – vino di vê pôre di vê coraç?
di Walter Tomada