SLOVENIE. Pahor tornât a elei president, al cale però l’interès dai eletôrs

Borut Pahor, 54 agns, al è stât confermât, domenie ai 12 di Novembar, president de Republiche di Slovenie par altris cinc agns. Inte balotazion – il president al ven elet in maniere direte cuntun sisteme eletorâl maioritari a dopli turni – al à otignût il 52,99% dai vôts (375.229). Il so sfidant, il sindic di Kamnik Marjan Šarec, ex atôr comic e imitadôr di personaçs politics, si è fermât al 47,01% (332.949). Di “new entry” inte politiche statâl Šarec, che ai 2 di Dicembar al à fat 40 agns, al à passât Pahor in dôs des vot circoscrizions là che e je dividude la Slovenie, e in 18 distrets. In ducj chei altris, al à prevalût Pahor che al à otignût un dai miôr risultâts intal distret di Tulmin – che al cjape dentri i comuns de Alte Val dal Lusinç, confinants cu la provincie di Udin -, dulà che al è rivât a cuasi il 60% des preferencis.
Ancjemò tant basse la afluence aes urnis, che si è fermade al 41,85% di chei che a àn dirit; chê dal prin turni e jere stade di pôc superiôr (44,24%). Ancje cinc agns indaûr, la afluence al secont turni e jere stade une vore basse (42,41%), duncje no son stadis grandis diferencis intal numar dai votants efetîfs (717.095 cuintri i 725.768 di cinc agns indaûr). L’interès pes elezions presidenziâls al è calât però une vore a pet des tornadis di prime. Intal 2007, al secont turni al è lât a votâ il 58,46% di chei che a vevin dirit, intant che al prin turni la afluence e jere stade dal 57,67%. Ae balotazion dal 2002, la afluence e jere stade dal 65,39% cuintri il 72,07 dal prin turni. Intal 1997 e intal 1992, cuant che al à prevalût Milan Kučan za al prin turni, la afluence e jere stade dal 68,29% e dal 85,84%. Al va dit che un trend dal gjenar si cjate però ancje intes elezions politichis. Intal 2014, al è lât aes urnis par elei il gnûf parlament dome il 51,73% di chei che a vevin dirit, intant che dome trê agns prime la afluence e jere stade dal 65,60%.
Par ce che al tocje i risultâts dai doi sfidants, si à di dî che il president Pahor intal 2012 al veve otignût ae balotazion plui di cent mil vôts in plui (478.859 a son stâts i eletôrs che lu àn votât cinc agns indaûr). Cun di plui, cheste volte, tra prin turni e balotazion, al à otignût dome cirche 20.100 vôts in plui. Une volte otignude la ciertece de rielezion, Pahor al à afermât che «mentri che aes elezions precedentis il vôt par me al jere leât in buine part ae contrarietât viers dal president che al jessive Türk, cheste volte i eletôrs a àn decidût par me e pe politiche che o puarti indenant. O capìs che i slovens si spietin che o intervegni cun plui frecuence, mi impegni a fâ sintî di plui la mê vôs.»
Pahor al à sotlineât ancje che il messaç principâl che al derive di cheste tornade eletorâl e je la vitorie de politiche che e unìs, rimarcant che ancje in Europe a son aromai rârs i câs là che al ven riconfermât il mandât ai politics in cjarie.
Sodisfat dal propri risultât ancje Šarec che al à dit di jessi braurôs di vê lotât, ae sô prime esperience a nivel statâl, fin ae fin (a pet dal prin turni là che al veve otignût il 24,76% – i candidâts totâi a jerin nûf, tra chei ancje esponents massims dai partîts slovens principâi -, al à concuistât plui di 146.700 vôts in plui) cuntun politic di lunc cors tant che Borut Pahor.
Il president sloven al svante di fat une cariere politiche une vore lungje. A dome 26 agns al jere za membri dal Comitât centrâl de Leghe dai Comuniscj de Slovenie; dopo la dissoluzion de Jugoslavie al à cuviert rûi impuartants inte rifondade Leghe dai Comuniscj de Slovenie – Partît democratic riformist, e al è stât leader dai socialdemocratics dal 1997 fin al Jugn dal 2012. Intal stes periodi al è stât ancje president dal parlament sloven, europarlamentâr e prin ministri sloven (tra il 2008 e il 2011). Inte Sierade dal 2012 al è stât elet president de Slovenie. Il secont mandât di president al sarà probabilmentri la sô ultime incarghe a nivel massim.
✒ Tjaša Gruden