ATUALITÂT – Publicitât par furlan: a ce pont sino? Inchieste-2

Tal numar passât (n. 6, Jugn 2009, pagjine 14) o vin scomençât a dâ un cuc aes aziendis che a doprin la marilenghe par promovi la lôr imagjin, la lôr marcje e i lôr prodots. No ’nd è cuissà cetantis a dî il vêr, e lis vôs dai imprenditôrs no son simpri positivis in mert. Ta chest numar o vin metût dongje dôs realtâts: une che e à provât a fâ marketing par furlan cence lâ indenant e une invezit plene di entusiasim, che no bandone la sielte fate.
UN BIEL INIZI; MA…_Scomencìn alore cu la Chiurlo s.r.l. che e comercialize prodots petrolifars, panei solârs e fotovoltaics, e fâs implants termics e v.i., cun sedis e dipuesits sparniçâts par dute la regjon. Par dî il vêr, nus à spiegât Patrizia Viezzi che e sta daûr ancje ae part de promozion, la aziende no ponte tant su campagnis publicitaris, ma ben suntun contat diret e interni cu la rêt dai clients. Dopo di une uniche esperience pe celebrazion dal centenari de fondazion (tal 2001), a àn pensât di tornâ a provâ cu la publicitât doprant lis pagjinis dal Messaggero Veneto cuntune campagne che e je scomençade tai prins mês dal 2007 e e je lade indenant fin tal Setembar di chel an. Za che a jerin, ur è vignude tal cjâf di fâ cheste operazion doprant il furlan, la lenghe di tancj dai lôr clients. L’entusiasim tal imprin al jere alt «par alc che al podeve sei ancje une robe simpatiche fate tune lenghe biele e musicâl», nus à dit Gianpiero Colautti che al veve pensât ai tescj. Chê volte cualchidun dai lôr clients al veve preseât la iniziative, ancje parcè che li de Chiurlo, aziende locâl, al capite dispès di rispuindi par furlan cuant che al sune il telefon e di sintî plui di une varietât insieme. La robe però si è sierade cu la fin de campagne publicitarie. Al è probabil che tal imprin si sedin lassâts strissinâ dal amôr pe marilenghe e de curiositât di provâ. La aziende cumò, ancje cui cambis de aministrazion, e preferìs invistî di altris bandis e chest al dimostre, ancjemò une volte, che la sielte di doprâ la lenghe dal puest par fâ cognossi la ativitât di une imprese, che e à lis sôs lidrîs tal teritori li che si le fevele, e dipent cetant de cussience e de sensibilitât dai singui aministradôrs che i son a cjâf. Cence chescj elements e je plui dure crodi che il furlan al è un valôr zontât ancje pe economie locâl.
UN PIONÎR ENTUSIAST_ Dute une altre musiche o vin sintût des peraulis di Adriano Mauro, fondadôr tal 1968 de Optex, la otiche dai zovins, che si cjate a Udin in vie Del Gelso. Mauro al podarès pardabon jessi cjapât a model di tancj siei coleghis imprenditôrs, pe sielte pioniristiche che al à fat. Cuant che o vin fevelât cun lui al jere tant che un flum in plene e no si faseve a timp a fâi lis domandis che al veve di bot prontis lis rispuestis. La Optex si è presentade ai siei pussibii clients cun difarentis campagnis publicitariis, ideadis di Sergio Tosoni, doprant il furlan. Si à podût viodilis su lis pagjinis dal Gazetin, da Il Diari e da Il Nuovo FVG e di cualchi setemane in ca e je propit vignude fûr la ultime version, la tierce. Origjinâls lis frasis in marilenghe che a doprin ancje mûts di dî che a partegnin al fevelâ comun (Mandi, si viodìn!!!, par esempli). Il titolâr de Optex nus à dit: «O ai sielt di promovi la mê aziende par furlan di pueste: o vevi chê di dâ une scjassade ai miei coleghis parcè che nissun di lôr al dopre il furlan par fâsi cognossi». E al è lât indenant: «O ai vût int che e je rivade dentri in buteghe cu la pagjine dal gjornâl in man dute contente e une siore, di no crodi, mi à ancje scrit disint che o vevi di doprâ il furlan te variant che e fevele jê». In sumis, il sucès par cheste iniziative al è stât cussì bon che al à decidût di lâ indenant e cumò al à fat vignî fûr juste apont la tierce version.
La sperance e je che cualchidun altri (e za tal numar passât da La Patrie o vin viodût che alc al è ator) al vedi il coragjo di Adriano Mauro che al à capît che la marilenghe e je une maniere direte e sclete par rivâ a la int e che i messaçs publicitaris a puedin vê bogns efiets ancje par furlan. Il savê cjalâ indenant e il provâ cun coragjo a varessin di jessi part de mentalitât imprenditoriâl, ma ogni tant i prejudizis, magari cussì no, a son plui fuarts.
ELENA ZANUSSI