Bassille, Acuilee, II-III sec. O savìn une vore pôc di chest personaç cetant curiôs e interessant. A Acuilee e je une epigrafe là che si ricuarde il so non e la sô profession: e jere une mime, ven a stâi – daûr de antighe art dal teatri roman – une balarine e cjantante, che si esibive in teatri pal public dai siei timps. Si dîs che e sedi stade plui che brave, tant che le clamavin la “decime muse”. E la sô fame e jere grande. Pecjât, e continue la epigrafe, che nissun al è imortâl. Pre Gjilbert Pressac, studiant par prin chest personaç cun voli gnûf e curiôs, al sugjerìs che il furlan “bacilâ”, intal significât di mantignîsi in ecuilibri cun fadie, al podarès derivâ propite di cheste antighe acrobate, che e torne a vivi ogni volte che o “bacilìn” inte musiche e intal bal di cheste nestre biele lenghe furlane.
✒ Agnul Floramo
