O sin lâts a viodi il biel spetacul Mamui, Schiribiç Mataran in Musiche al Mittelfest 2107

Il spetacul Mamui e jere la opare par furlan “in cartel” al Mittelfest 2017. Al è stât volût e sostignût de Provincie di Udin e, come che al à dit Fabrizio Pitton, President dal Consei Provinciâl, che al à vierte la serade cui salûts dal President Fontanini, impegnât tal forest, e sarà forsit la ultime volte che la Provincie e podarà vê un rûl cussì atîf intune manifestazion di cheste fate e puartade.
Sul palc, la compagnie vocâl feminîl di Artevoce Ensamble, cu lis musichis di Valter Sivilotti e lis percussions di Francesco e Nicola Tirelli, e à cjantât lirichis furlanis cun sonoritâts che a son passadis de balade popolâr ae eletroniche, cence scjas e cence mai pierdi armonie.
Il Coro Panarie, diret dal mestri Paolo Paroni, al à compagnât dut il spetacul cun cjants e cun suns, fintremai a fâ vivi al public presint lis sensazions de ploie, dal aiar e dal temporâl.
Come la musiche, ancje i moviments e la coreografie a àn traviersât i secui, passant lizêrs tant che intun sium, de danze popolâr a chê contemporanie.
Protagoniste principâl, in chest miscliç di musichis e peraulis, antighis e pûr modernis, Marina De Juli, vignude fûr de compagnie teatrâl di Dario Fo e Franca Rame.
Cuntun svol tra storie e liende, tra leterature e contis popolârs e à introdusût il teme dal spetacul che al jere l’amôr e l’ossen. E cussì, partint di Eve e passant par Cielo d’Alcamo (poete bufon sicilian) e sul so vêr non che al jere Ciullo, si è rivâts fin ae storie dai conts Savorgnan del Torre e Savorgnan del Monte che a varessin ispirât Shakespeare pal so Romeo and Juliet.
Di marcâ dentri dal spetacul il monolic de La Parpaja Topola, di Dario Fo, voltât par furlan antîc di Carlo Tolazzi, che la De Juli e à puartât sul palc, pûr no jessint jê par nuie furlane, come part principâl de serade, fasint ridi di gust dut il public di Cividât che al à jemplât ducj i puescj disponibii.
Cu la sô bravure, la sô mimiche e la sô grande teatralitât, e cul ritmi di un furlan sclet e vivarôs, sul palc si son viodûts ducj i personaçs de storie come se a fossin li e nol è stât dificil imagjinâsi la muse di chel puar batali di Zuan Pieri.
Une interpretazion che e à mostrât cemût che il furlan al pues jessi doprât ai plui alts nivei culturâi, che e à fat ridi ducj, e che a plui di cualchidun i à fat vignî ogni pêl un pan.
✒ Radeschi