SLOVENIE. Un progjet internazionâl pe economie circolâr

La Associazion dai Comuns-citâts de Slovenie e je une dai socis dal progjet CircE – European regions toward Circular Economy (Regjons europeanis bande la economie circolâr) che si propon di miorâ lis politichis regjonâls pe economie circolâr midiant dal scambi di esperiencis e di buinis pratichis a nivel comunitari. Economie circolâr al è un tiermin par definî un sisteme economic pensât par podê rigjenerâsi di bessôl.
Il progjet al cjape dentri trê setôrs principâi: turisim, gjestion dai refudums e mobilitât. Chei altris socis a son la Regjon Lombardie, la Regjon Catalogne in Spagne, la Regjon de Basse Slesie in Polonie, la Provincie di Gelderland intai Paîs Bas, il London Waste and Recycling Board, il Creation Development EcoEntreprises CD2E (une agjenzie di disvilup de Regjon Haute di France) e la Citât di Sofia in Bulgarie.
Di pôc la Slovenie, dulà che il progjet al è stât inviât intal Zenâr dal 2017, e à ospitât i rapresentants dai socis dal progjet, che ur è stât presentât ancje cualchi esempli concret des ativitâts za inviadis o in program par disvilupâ la economie circolâr.
L’argoment al è stât tratât in precedence ancje dilunc dal incuintri promovût de Associazion dai Comuns-citâts de Slovenie cu lis parts interessadis (organizazions di setôr, ministeris competents, esperts e comuns interessâts). Lis ativitâts in Slovenie a varessin di concentrâsi soredut sui setôrs agricul e alimentâr, su la gjestion dai refudums e sul turisim, che a son stâts individuâts tant che chei che a ufrissin potenzialitâts plui grandis pal disvilup di une economie circolâr.
Par ce che al tocje il prin setôr, al è stât evidenziât che al sarès bon promovi la formazion di cooperativis agriculis. Cuntune cooperazion mutuâl plui largje, i piçui produtôrs a podaressin garantî une cuantitât suficiente dai singui prodots alimentârs par partecipâ ancje ai apalts publics. La azion che e ufrìs plui prospetivis in chest setôr e sarès la rivitalizazion de bande des comunitâts locâls dai cjasâi abandonâts. In Slovenie a saressin di fat plui o mancul 50.000 aziendis agriculis abandonadis li che si podaressin disvilupâ la agriculture biologjiche e il turisim vert. Un esempli concret di ativitâts za inviadis cun sucès in chest setôr a son lis „filieris verdis”: un progjet pilote che al è stât ativât inte aree di Lubiane ae fin dal 2015. Ae rêt a àn aderît za 11 coltivadôrs di Lubiane e 16 produtôrs dai contors. Tra i prossims obietîfs intal ambit dal progjet a son une marche coletive pai aliments produsûts a nivel locâl e il delineâ un model definitîf di colaborazion.
Il setôr agricul alimentâr al è leât a strent ancje al turisim. Tra lis misuris e i intervents orientâts bande la economie circolâr a jentrin di fat ancje la creazion di filieris curtis agroalimentârs destinadis massime a cui che al opere intal setôr turistic, e la creazion di une plateforme digjitâl acessibile a ducj che e meti in rêt i produtôrs alimentârs locâi e che e incentivi in maniere sistematiche la cooperazion tra i furnidôrs di servizis e di prodots verts.
Il turisim, che al contribuìs al 13% dal PIL sloven, al è in ogni câs il setôr che al ufrìs oportunitâts plui grandis pal disvilup de economie circolâr. La Slovenie e je di fat di agns orientade soredut viers il turisim vert e sostignibil. Une des ativitâts concretis in chest setôr za indreçadis bande une economie circolâr e rivuarde lis struturis ricetivis. In Slovenie al è stât inviât di pôc il progjet pilote dai albiercs difondûts, formule za consolidade in Friûl-Vignesie Julie e in Italie. Di fat, i promotôrs dal progjet, cualchi an indaûr a àn analizât tant che esemplis di buinis pratichis i albiercs difondûts in Cjargne. Il procès di creazion di une plateforme, adate pe grande part dal teritori sloven, al è dome inte fase iniziâl. Al moment, il progjet al cjape dentri sîs grups di azion locâl di diviersis zonis slovenis, tra chês lis areis di Padna, Snežnik (Monte Nevoso) e Bohinj. Dopo vê verificât tropis che a sedin in efiets lis struturis in stât di ufrî chest gjenar di servizi, al vignarà disvilupât il model.
✒ Tjaša Gruden