La Sisile e je une aziende agricule metude in pîts di cirche un an di Elena Sica, une zovine cun tante voie di fâ di Divilin di Vile Santine.
«Nô, come famee, o vin simpri vût cjamps di cartufulis”, e conte Elena. “A mi mi è simpri plasude la idee di vê un lavôr par gno cont e soredut di stâ fûr intal mieç de nature, no sierade intun ufici. Finît il liceu sientific, o ai pensât di cjoli un toc in plui di cjamp di coltivâ e di vierzi une aziende. E cussì o ai fat.»
La sielte dal non La Sisile no je stade fate a câs, anzit e je un grum leade al ricuart dal mont di frute di Elena Sica: «Cuant che o jeri piçule, o lavi simpri tal cjamp cun mê mari e mê none, e o viodevi simpri lis cisilis a svolâ. Dopo, o ai tacât a lâ a scuele; deventade grande, no sei lade plui tal cjamp e no ‘nd ai plui viodude nissune. Cuant che o soi tornade tai cjamps, o ai tornât a viodilis. Mi plaseve fâ riferiment a chest fat e alore i ai dât il non La Sisile ae mê aziende.»
Ciert, il lavôr di Elena al è impegnatîf e, e dîs «tancj a son i sacrificis: in Primevere che nol è tant cjalt o lavori dut il dì, di Istât invezit o jevi adore e o stoi tal cjamp fin 10.30-11.00 e po des 4 dopomisdì fin 8-9 di sere. I lavôrs a son simpri chei: o fâs la jerbe tai cjamps, o semeni, o viôt des plantis se a son di sistemâ… Cumò o soi daûr a cjapâ sù cartufulis e duncje il gno timp lu dedichi dome a chel. O ai 5 cjamps a Divilin e un a Fusee: 1 etar e 2 di tiere di coltivâ…Trê cjamps a son dome di cartufulis di trê cualitâts (blancje, rosse e viole, di semencis de Cjargne), cevolis, fasûi, cesarons. Tai doi cjamps dongje cjase o ai dut ce che si met tal ort: melanzanis, lidric, pevarons, cavoçuts, jerbetis rossis, verze, verzots… A pene vierte la aziende, o ai fate domande par vê la certificazion biologjiche e o soi inmò daûr cu la burocrazie: i miei prodots a son biologjics, tal sens che la semence e lis plantutis a son za biologjichis, e ancje la robe che o dopri (ledan e ce che mi covente) e je naturâl, cence nuie di chimic. Par vê la certificazion, e je dute une procedure di fâ: a vegnin a fâ 2-3 controi ad an, a son i regjistris di compilâ indulà che o cjapi note di ce che o ai metût tal cjamp (se o ai di butâ un pôc di ram o di ledan, o scuen segnâ dutis la cuantitâts che o met). Dopo dal lavôr tai cjamps, al ven ancje il lavôr des cjartis! Tal control che al ven fat, a viodin i regjistris e dopo a van tai cjamps a controlâ se ce che o ai scrit al corispuint.»
I prodots di Elena si cjatin ogni lunis al marcjât di Tumieç e a Denemonç, a Carniagricola. «La int e à bisugne di tornâ indaûr e di mangjâ ben, e e cîr chescj prodots. O ai int che mi ven a cjase cuant che e vûl e o lin tal cjamp a cjapâ sù la robe, o ben mi clame, mi fâs l’ordin al telefon e jo i prepari i prodots. Di Invier, o ai ancjemò cartufulis e cualchi capûs, la tiere e à bisugne di polsâ e la ativitât si ferme, ancje parcè che no ai sidreris par podê continuâ la coltivazion: o pensi che tra un pôc lis metarai, par podê slungjâ la disponibilitât dal prodot un pôc plui a dilunc.»
Cui che al vûl savê alc di plui, al pues viodi la pagjine www.lasisile.com o la pagjine facebook La Sisile. E propit achì, si podarà scuvierzi la passion che Elena e à pal so lavôr: «Si lavore ancje a Madone di Avost… e ce mâl isal? Se al è fat cun passion, nol pese gran!»
✒ Marta Vezzi
