Sfuei Mensîl Furlan Indipendent
Archivi de Patrie

SCOMENCÂTS PAR FURLAN. Moby Dick

............


.
.

(voltât di Stefano Montello)
Claimaitmi Ismaêl. Cualchi an indaûr – nol impuarte cetancj di precîs – vênt li sachetis vueidis e pôc o nuie di ce di fâ a tiere che al fos interessant par me, ai vût pensât di lâ un pôc par mâr, par viodi la part agose dal mont. Al è un mût che o ai par dreçâ il spleen e regolâ la circolazion. Ogni volte che mi cjati su la muse une bocjate di marum, ogni volte che la mê anime e disgote pluvisine sicu un Novembar tacadiç; ogni volte che mi cjati a inçussîmi denant un rivindicul di cassis di muart o a tacâmi in code a un funerâl scognossût; e soredut cuant che la ipocondrie mi ten cussì peât che dome un principi morâl di açâl al pues impedîmi di butâmi in strade a rote di cuel e di metimi a sbati par tiere i cjapiei de int un dopo chel altri – alore mi rint cont che par me e je rivade la ore di molâ dut e di cjapâ il mâr. Al è chest il gno sostitût de pistole o de bale di sclop. Cuntun zest teatrâl, Caton a si bute su la sô spade e jo, cuzo cuzo, o cjapi une barcje. E no ‘nd è nuie di strani. Se dome lu savessin, la plui part dai oms, ben o mancul, a sintaressin i miei stes sentiments viers l’ocean.
Ve, duncje, la citât di mâr dai Manhattoes, dute çurnide di bancjinis, sicu lis isulis dai indians dai bancs di coral: il cumierç le involuçe, come la sbrume di mâr une splaze. A diestre e a çampe lis stradis a puartin viers la aghe. La ponte estreme de citât e je la Battery, indulà che il so nobil imbarcjadôr al è cjarinât des ondis e rinfrescjât di chês baviselis di mâr che dome pôc prime a si platavin là che la tiere ancjemò no si viôt. E cjalait chê rieste di int che si è ingrumade là ju, a rimirâ la aghe.
Provait a cjaminâ pe citât intun dopomisdì voladiç dal Sabbath. Lait jù par Corlears Hook fin a Coenties Slip, e di là par Whitehall viers nord. Ce viodêso? Plantadis come vuardiis cidinis, dut ator ator da lis cjasis, a stan miârs e miârs di mortâi inclapâts te lôr memoriis oceanichis.
par cure di Pablo Gortan e Dree Venier
_________________________________________________________
Il libri e l’autôr
Moby Dick, or the Whale (1851) al è il romanç plui innomenât dal american Herman Melville. Tal libri, il marinâr Ismaêl al conte dai scuintris epics de nâff Pequod cuntune balene albine: Moby Dick. Ma se la mitiche bestie erede dal Leviatan biblic e je la antagoniste, il protagonist dal romanç, Ahab, nol è mancul teribil. Melville (1819-1891), nassût di une famee siore colade in disgracie, si imbarcjà une vore zovin su une nâf. Considerât un autôr minôr, a tacâ dai agns ‘20 i critics a tornarin a leilu e studiâlu fin a considerâlu un dai autôrs miôr dal Votcent.
_________________________________________________________
Il tradutôr
Stefano Montello di simpri al met adun il lavôr te sô aziende agricule cu la ativitât di musicist e di scritôr. Al è fondadôr dal grup musicâl Mitili F.L.K., tra i prins esponents de Gnove Musiche Furlane nassude tai agns Novante, e autôr di cetancj libris sedi par talian che par furlan: fra i altris, La sere dal mulinâr (1990) e L’albar dai agnui (1993), ducj i doi cun Flavio Zanier; La solitudine del mitilo (2003), La casa con i baffi (2006), Manuâl critic pal ort. L’art da la jeche (2008), L’albero capovolto. Le opere e i giorni in una fattoria sociale (2016).

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +