La propueste di Patrie Furlane par un “cartel” des minorancis pes elezion dal 2018

Par ducj i partîts talians che a fasin part de Efa il probleme plui grues dal pont di viste politic al è un sôl: jessi bogns di fâ rêt par contâ di plui, rispiet a un Stât centralist che des minorancis al ten simpri mancul cont. Cemût rivâ adore però a meti in vore lis strategjiis par vê une rapresentance dai lôr popui cuant che lis leçs eletorâls di cualsisedi fate a van a striçâ simpri di plui i spazis pes realtâts minoritariis des autonomiis? Za cjatâsi a resonâ insiemi inte suaze dal Efa al è impuartant par capî che il teren de rivendicazion su lis regulis de rapresentance al è une vore clop, e bisugne cirî di zontâsi par frontâ un centralisim che a ogni nivel (di chel nazionâl a chel european) al scjafoie ogni voie di autoguviernâsi des comunitâts.
Par chest, la idee di un “cartel” des minorancis aes elezions che a vignaran e scomence a fâsi dongje, sedi par Rome che par Triest. Federico Simeoni al è stât clâr tal so fâ une propueste fin cumò inedite: «Al sarès biel che pes elezions regjonâls dal 2018 si rivàs a meti adun une coalizion che e ledi a rapresentâ ducj i teritoris e dutis lis comunitâts dal Friûl-Vignesie Julie che no si ricognossin tal dissen di disvuedament de nestre autonomie puartât indevant intai ultins dîs agns. Par chest, o fasìn apel ai slovens parcè che a fasin part di cheste aleance, dulà che il lôr contribût al è pardabon fondamentâl».
Fin cumò la Slovenska Skupnost e je stade garantide intes sôs prerogativis di rapresentance de int slovene che e vîf inte nestre Regjon di un acuardi cul centriçampe, ma cheste aleance no je plui solide: ancje parcè che lis leçs eletorâls che fin cumò a son vignudis indevant no garantissin plui ae minorance slovene un seç sigûr. Cuintri la pecje di rapresentativitât de leç, Simeoni al à za fat ricors. «Ma il Tar di Triest nol à premure», soredut parcè che al riscje di rivâ a decidi alc in contrast cu la gnove leç che il Parlament al varà di burî fûr. Par chest, i slovens a varessin interès a fâ part dal cartel eletorâl autonomist che Patrie Furlane al sta creant cul Pat pe Autonomie e cui Manoâi di Jalmì, par fâ vê ai furlans alc di pardabon diferent di podê sielzi su la schede.
✒ Walter Tomada