Cecilia, la stele dal folk cjargnel. Nus à lassâts la regjine de armoniche

Nus à lassâts la femine che plui di ogni altre e à rapresentât la musiche in Friûl. Une robe sole cu la sô armoniche, un dutun cu la int che le scoltave e che jê e saveve fâ balâ cence polse. Un simbul inimitabil, une ambassadore dal folclôr musicâl cjargnel. Cecilia Boschetti, cognossude tant che Cecilia Folk, si è distudade ae etât di 80 agns, ai 15 di Març intal Ospedâl di Glemone. Un displasê par ducj. Nassude a Çurçuvint ai 28 di Zenâr dal 1937, fie di artist – so pari al jere un sunadôr di liron -, e mari di artiscj, ven a stâi di Gigi Maieron, il cjantautôr cjargnel, e di so fradi Daniele.
Insiemi, ducj e trê, a jerin i components dal Trio Cecilia, un grup che ben adore al jere deventât un element insostituibil tes sagris e fiestis pardut in Friûl e inmò plui lontan. Jê ae armoniche, Gigi ae ghitare e Daniele ae vôs. Une des ultimis aparizions insiemi e je stade intal 2011 tal Auditorium “Candoni” di Tumieç, cuant che al è stât presentât il lavôr discografic di Maieron dal titul: “Vino, tabacco e cielo”.  Une comozion par ducj. Purtrop al è dificil rivâ a cjatâ fûr cualchi regjistrazion o filmât sul so cont.
Al esist l’album “Cecilia Folk, la vous de Cjargne”, 25 cjançons regjistradis pe AVF di Nimis. Al è inmò sore biel lei di jê, des sôs esibizions musicâls midiant di internet, a dimostrazion che la sô nomee e la grande considerazion sul so cont no à mai vût confins, buine di jessi impuartante sedi sui breârs pes baladis, sedi inte virtualitât de rêt. A son tancj i coments lassâts dai apassionâts de sô musiche e dal so caratar sclet, che si puedin lei su internet.
Un dai plui biei al è chel dal comic cjargnel e so grant amì Romeo Patatti, che al scrîf su facebook: «Nuie ce dî… cuant che e sunave jê a Dimponç, si puartave jù dut Çurçuvint, Sudri, Paluce e tante altre int. Tu podevis clamâle ogni sere che il tendon al jere simpri plen, cu la sô semplicitât, ligrie e la sô maniere uniche di movi e sunâ la sô armoniche e jemplave il cûr a ducj. Mandi Cecilie, un mît che al restarà par simpri tal cûr di ducj nô». ❚
✒ Alessio Screm