LA PARABULE DAL MÊS. La parabule dal bon Samaritan

La parabule dal bon Samaritan
Lc 10,25-37
Une parabule straordenarie cuintri l’indiference o, ancjemò piês al dì di vuê, de globalizazion da l’indiference, par dîle cul pape Francesc. I atôrs de sene Gjesù no ju à sielzûts a câs: I oms di religjon, adets al cult, no vevin timp, a vevin di lâ a funzionâ tal templi, e cussì a sierin i vôi e il cûr. Ce brute figure che a fasin i predis!
Invezit al è un eretic, un scomunicât che si ferme, al à compassion, al à dûl, al jude e ancjemò cence motivazions religjosis. Lis cundizions dal ferît a son motîf suficient par pleâsi, intervignî. Il Signôr nol cjale la posizion sociâl, la ideologjie, ma il cûr, la tenarece, l’umanitât.
Cui isal il prossim? Ducj chei che a àn bisugne di me!
²⁵Un dotôr de leç, volint metilu a lis provis, al jevà sù e i disè: “Mestri, ce àio di fâ par vê la vite eterne?”. ²⁶Gjesù i rispuindè: “Ce isal scrit in te Leç? Ce leistu?”. ²⁷Chel om i disè: “Tu amarâs il Signôr, to Diu, cun dut il to cûr, cun dute la tô anime, cun dutis lis tôs fuarcis e cun dut il to sintiment e il to prossim come te in persone”. ²⁸Gjesù i disè: “Tu âs rispuindût ben; fâs cussì e tu vivarâs”.
²⁹Ma il dotôr de leç, volint cjatâ fûr une reson, i disè a Gjesù: “Ma cui isal il gno prossim?”. ³⁰Gjesù i rispuindè: “Un om al vignive jù di Gjerusalem a Gjeric, cuant che si intivà tai brigants che i puartarin vie dut, lu pestarin e po si ‘nt lerin lassantlu li plui di là che di ca. ³¹Par cumbinazion al passà par li un predi, al viodè l’om ferît e al lè dret, di chê altre bande de strade. ³²Ancje un levit al passà di li; ancje lui lu viodè e, passant par dongje di lui, al lè pai siei viaçs. ³³Invezit un Samaritan che al jere in viaç i passà dongje, lu viodè e al sintì dûl di lui. ³⁴Si sbassà sore di lui, al strucjà vueli e vin su lis sôs feridis e jes fassà. Po lu cjamà sul so mus, lu puartà te locande e al fasè dut il pussibil par judâlu. ³⁵Tal indoman, al tirà fûr doi denârs, jai dè al ustîr e i disè: Viôt di lui e ce che tu spindarâs in plui tal rifondarai cuant che o torni indaûr. ³⁶Cui di chescj trê ti parial che al sedi stât il prossim di chel che si jere intivât tai brigants?”. ³⁷Il dotôr de leç i rispuindè: “Chel che al sintì dûl di lui”. Alore Gjesù i disè: “Va e fâs ancje tu compagn”.
✒ par cure di pre Roman Michelot